Dy vëllezër kanë rënë në prangat e Policisë së Elbasanit pasi akuzohen për prodhim dhe shitje të lëndëve narkotike dhe armëmbajtje pa leje.
Gjatë kontrollit të Policisë në banesë dhe automjet u kontstauar dhe sasia e lëndës narkotike e llojit kanabis, konkretisht 33.5 kg. Ndërkohë është gjetur dhe një armë zjarri, municione luftarake dhe disa celularë që dyshohet se i përdornin për t’u lidhur me klientët.
Postimi i plotë i Policisë
DVP Elbasan / Sekuestrohen 33.5 kg lëndë narkotike kanabis dhe municion luftarak.
Finalizohet, pas një hetimi intensiv proaktiv, operacioni policor i koduar “Presentation”.
Mbanin në automjet dhe në banesë, sasinë prej 33.5 kg lëndë narkotike kanabis, kapen në flagrancë dhe vihen në pranga 2 shtetas (vëllezër).
Të arrestuarve iu sekuestruan edhe një pjesë arme zjarri, automjeti me të cilin transportonin lëndë narkotike dhe aparatet celulare.
Specialistët e Seksionit për Hetimin e Narkotikëve, Seksionit të Forcës Operacionale të DVP Elbasan, komisariateve të Policisë Gramsh dhe Skrapar, në bashkëpunim me specialistët e AMP-së, në vijim të operacioneve të pandërprera për goditjen e veprimtarive kriminale në fushën e narkotikëve, kanë finalizuar, pas një hetimi intensiv proaktiv, në bashkëpunim me Prokurorinë pranë Gjykatës së Rrethit Gjyqësor Elbasan, operacionin policor të koduar “Presentation”.
Si rezultat i këtij operacioni janë arrestuar në flagrancë shtetasit:
-S. I., 36 vjeç dhe E. I., 33 vjeç (vëllezër), banues në fshatin Trebel, Skrapar, për veprën penale “Prodhimi dhe shitja e narkotikëve”, kryer në bashkëpunim.
Gjatë kontrollit të ushtruar në automjetin me të cilin lëviznin këta 2 shtetas dhe në banesën e tyre, u gjetën dhe sekuestruan në total, rreth 33.5 kg lëndë narkotike kanabis. Gjithashtu, të arrestuarve iu gjetën dhe iu sekuestruan automjeti me të cilin transportonin lëndë narkotike, një pjesë arme zjarri, municion luftarak dhe aparatet celulare.
Në bashkëpunim me Prokurorinë pranë Gjykatës së Rrethit Gjyqësor Elbasan, vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet procedurale u referuan në Prokurori.