Ka një agresion nga Foltorja kundër Partisë Demokratike dhe kryesisht dyshes Basha- Alibeaj, përse ata ofrojnë paqe me mbështetësit e Foltores dhe kërkojnë që të rikthehen në PD, pa sjellë me vete shkaktarët e përçarjes.
Tani të gjitha humbjet e pritshme të Sali Berishës dhe Metës kanë filluar t’u faturohen këtyre dy politikanëve, dhe puna po shkon deri tek thirrje linçuese fizike.
Po a është ky thjesht nervozizëm nga humbja?
Jo.
Për të kuptuar më qarte këtë situate, mendoni një moment sikur gjyqin për vulën ta kishte fituar Sali Berisha.
Së pari, nëse gjyqin do ta kishte fituar ai, thirrjet për dhunë dhe linçim ndaj Bashës e Alibeajt, do të ishin edhe njëqind herë më të forta se kaq. Tani ato thirrjet bëhen nga pozitat e njerëzve të dëshpëruar dhe të pashpresë, që problemin të cilin ja krijuan vetë PD-së, duan t’ua faturojnë të tjerëve.
Por po ta fitonin vulën, ata nuk do ofronin paqe, siç ofrojnë këta, por do niseshin vetë “drejt shtëpive të tyre”, siç e kanë zakon shpellarët e Berishës në këto raste.
Së dyti, nëse gjyqin për vulën do ta kishte fituar Berisha, jo vetëm që nuk do kishte ofertë për bashkëpunim, por do linçohej çdo kandidat i PD zyrtare qytet më qytet, degë më degë, bashki më bashki.
Mentaliteti i dhunës i Berishës ka qenë i vetmi motivim në gjithë betejën e tij shkatërrimtare për opozitën. Ai çdo ditë mendon për PD si më 8 janar të 2022, kur ju turr me vare dhe qysqi për ta marrë.
Së treti, nëse gjyqin për vulën do ta merrte Sali Berisha, do të kishim dhe një linçim edhe më të madh publik nga mediumet e Berishës kundër këtyre dy figurave.
Tani Lulzim Basha dhe Enkelejd Alibeaj akuzohen pse bëjnë sikur kërkojnë bashkim. Merreni me mend se si do akuzoheshin sikur të kërkonin ndarje.
Klima e linçimit që Berisha krijon ndaj armiqve të tij, është i vetmi motivim që ai ka për turmat, çfarë tregon dhe cilësinë e mbështetësve të tij, që dominohen nga hakmarrja dhe jo bashkëpunimi politik.
Tani çfarëdo që të bëjë Alibej apo Basha, edhe nëse kërkojnë bashkim, edhe nëse kërkojnë luftë, edhe nëse kërkojnë bisedime, edhe nëse kërkojnë ndërprerje komunikimi, edhe nëse dërgojnë ndërmjetës për bisedime, edhe nëse refuzojnë ndërmjetës, ata të dy, Sali Berishës i duhen armiq dhe përçarës, pasi ndryshon nuk fsheh dot të vërtetën e madhe të gjithë kësaj drame të opozitës.
E vërteta e madhe është se i vetmi përçarës edhe si person, edhe si arsye, edhe si familje, është Sali Berisha.
Ndaj mos kërkoni prej tij dhe hordhive të tij të ndalin këtë fushatë linçuese. Kjo është e vetmja dëshmi publike që provon kush është vrasësi i opozitës.
Pa këtë fushatë të tij, dikujt mund t’i shkonte mendja edhe tek Basha apo Alibeaj. Por Berisha e ka këtë të mirë, që nuk lejon të tjerët t’ia marrin meritat. Dhe këtë meritën e përçarësit dhe tani të fundosësit të opozitës nuk ja merr dot njeri. Edhe sikur ta merrte vulën, prapë do ta ruante këtë meritë.