Britania/ 4.3 milionë fëmijë jetojnë në varfëri

BOTA


Numri i fëmijëve që jetojnë në varfëri në Mbretërinë e Bashkuar ka arritur një nivel të paprecedentë për herë të parë në të paktën 20 vjet, ndërsa kriza e kostos së jetesës së vendit godet.

Sipas shifrave zyrtare të publikuara këtë të enjte nga Ministria e Punës, 4.3 milionë fëmijë jetojnë në familje me të ardhura të ulëta. Rekordi i mëparshëm u vendos në vitin 2020, kur 4.28 milionë fëmijë jetonin në familje me të ardhura nën 60% të mesatares. Në vitin 2023 këto të ardhura u rritën në 545 £ (635 €) në javë.


Në përgjithësi, 21% e popullsisë ishte në varfëri, pra 14.3 milionë njerëz. Kjo përqindje është ulur me një njësi krahasuar me një vit më parë.

Ndërmjet viteve 2022-2023, vendi përjetoi për muaj me radhë nivele të paprecedentë inflacioni, duke kaluar 10%, për shkak të rritjes së çmimit të energjisë dhe ushqimeve, kryesisht si pasojë e luftës në Ukrainë.

Pavarësisht përfitimeve të dhëna nga shteti për të mbështetur familjet (3,800 £ ose 4,430 € mesatarisht për familje), kjo krizë goditi rëndë britanikët.

Numrat “tregojnë se qeveria ka dështuar të mbrojë më të cenuarit“, tha Peter Matejic, një analist në Fondacionin Joseph Rowntree, një organizatë që lufton varfërinë në Mbretërinë e Bashkuar.

Qeveria beson se me lehtësimin e inflacionit, i cili ra në 3.4% në shkurt, presioni mbi familjet tashmë është zbutur./abcnews.al




Skip to toolbar