Sekretari i Përgjithshëm i PS-së Taulant Balla, i ftuar në emisionin “Real Story” në “News 24”, duke folur për emrin e presidentit të Republikës, deklaroi se kjo çështje do të jetë pjesë e një tryeze të përbashkët.
Balla theksoi se PS nuk do të marrë iniciativë emërimi të kreut të shtetit pa konsultë me PD-në.
“PS synon të fitojë edhe mandatin e katërt dhe unë nuk e fsheh, për shkak se kemi ofertën më të mirë nga partitë e tjera. Mbështes Ramën, çështjen e zgjedhjes së presidentit ta kemi pjesë të një tryeze. PS ka emra brenda saj që mund të bëjnë shkëlqyer presidentin në çdo moment, Partisë Socialiste nuk i është dhënë mundësia që të ketë president. PS nuk do marrë iniciativë për emërimin e presidentit, pa konsultë me PD-në. Mendoj se çështjen e zgjedhjes së presidentit të ri mund ta marrim në mënyrë më të përgjithshme”, tha Balla.
Taulant Balla vlerësoi figurën e kryetarit të parlamentit, Gramoz Ruçi, duke thënë se i jep nder postit të kreut të Kuvendit.
“Është hera e parë që një parti politike në Shqipëri merr mandat të tretë dhe pritshmëria e qytetarëve është e madhe. Jam shumë krenar që jemi një vend, ndër më të paktët të prekur nga Covid. Kemi edhe betejën e rindërtimit. Beteja u fitua, por sfidat janë përpara. Kemi bërë analizë të gjithë performancës sonë. Ne do të mbajmë përgjegjësi për çdo gjë, ne na duhet kohë që të veprojmë. Ruçi i ka dhënë dinjitet postit të kreut të Kuvendit. Ka një lajm të pavërtetë në lidhje me gazetarët. Mund të lejohen edhe qytetarët e jo më qytetarët, por problemi do marrë udhë, nëse mund të ketë ndonjë problem të vogël. Për t’u kthyer tek kreu i Kuvendit, Ruçi do të vazhdojë të jetë në krye të parlamentit shqiptar”, u shpreh Balla.