FBI-ja fajësoi të mërkurën Korenë e Veriut për vjedhjen e 1.5 miliardë dollarëve në asete digjitale të zbuluara javën e kaluar, shuma më e madhe e njohur e kriptomonedhave të vjedhura ndonjëherë.
Koreja e Veriut “është përgjegjëse për vjedhjen e rreth 1.5 miliardë dollarëve në asete digjitale nga shkëmbimi i kriptomonedhave Bybit”, tha agjencia në një deklaratë.
Bashkëthemeluesi dhe CEO i Bybit, Ben Zhou tha të premten në median sociale X se “afërsisht 400 mijë Ethereum” u vodhën gjatë operacionit.
Vjedhja i atribuohet organizatës koreano-veriore TraderTraitor, e njohur gjithashtu si “Grupi Lazarus”, tha FBI-ja.
Grupi Lazarus “konvertoi shpejt disa nga asetet e vjedhura në Bitcoin dhe asete të tjera digjitale të shpërndara nëpër mijëra adresa në blockchain të shumtë”, tha burimi.
Tani, “këto asete pritet të pastrohen dhe të konvertohen në kartmonedha”, tha FBI-ja.
Grupi Lazarus u bë i njohur rreth një dekadë më parë kur u akuzua për hakmarrje ndaj kompanisë amerikane të prodhimit Sony Pictures Entertainment, në shenjë hakmarrjeje për publikimin e filmit “Interview”, i cili përqesh liderin e Koresë së Veriut Kim Jong-un.
Besohet gjithashtu të fshihet pas vjedhjes së monedhave Ethereum prej 620 milionë dollarësh nga Ronin Network në vitin 2022, asokohe konsiderohej vjedhja më e madhe e kriptomonedhave në histori.
Në dhjetor, Shtetet e Bashkuara dhe Japonia e akuzuan atë për vjedhjen e më shumë se 300 milionë dollarëve kriptomonedha nga shkëmbimi japonez DMM Bitcoin.
Ethereum është kriptomonedha e dytë më e madhe në botë për nga kapitalizimi i tregut.
Ai bazohet në blockchain, një protokoll kompjuterik që lejon që transaksionet të regjistrohen në një mënyrë të decentralizuar dhe teorikisht të paprekur në të gjithë botën.
Vitin e kaluar, një grup ekspertësh të Kombeve të Bashkuara për shmangien e sanksioneve të Koresë së Veriut vlerësoi se vendi kishte vjedhur më shumë se 3 miliardë dollarë në kriptovaluta që nga viti 2017.