Kolegji Zgjedhor ka pranuar ankesat e para individuale të kandidatëve apo partive të koalicionit të Berishës për të shqyrtuar kërkesat për rinumërim votash.
I pari, Ilir Alimehmeti që kërkon rinumërim votash për Tiranën. Doktori i ri doli kundër doktorit të vjetër, Berishës, dhe tani vendimin do e ketë Kolegji Zgjedhor, pasi Komisioni i Ankesave dhe Sanksioneve e rrëzoi me votat e anëtarëve demokratë.
Seanca e parë gjyqësore do të mbahet paraditen e 12 qershorit në Gjykatën Administrative të Apelit në Tiranë. Po ashtu, të njëjtën rrugë ka zgjedhor edhe kandidati i listës së hapur në Kukës, Shkëlqim Shehu. Mandatin e dytë, ai e humbi për pak vota të diasporës ndaj Isuf Çelës, ky i fundit një ndër deputetët më besnikë të Berishës.
Shehu kërkon po ashtu rinumërim votash në qarkun e fituar nga demokratët, duke dalë kundër kryedemokratit, që ankesat i pranon të kalojnë vetëm nga zyra e tij.
Por, edhe një tjetër parti aleate ka dalë kundër Berishës. Ashtu si Partia Lëvizja e Legalitetit, edhe Partia e Ballit Kombëtar Demokrat kërkon rinumërim votash në Durrës.
Përveç zogistëve, edhe ballistët nuhasin tradhëti nga Berisha.
Tashmë, vendimi u përket gjyqtarëve të Kolegjit Zgjedhor, mes kandidatëve të Partisë Demokratike që akuzojnë Berishën se u vodhi votat preferenciale, dhe vetë doktorit që mes dy standardeve, në fillim i mbështeti më pas i lëshoi.