Policia ka ndaluar organizimin e protestës së paralajmëruar nga kreu i PD-së, i zgjedhur nga Komisioni i Rithemelimit, Sali Berisha më 6 dhjetor në Bulevardin “Dëshmorët e Kombit”.
Në përgjigjen drejtuar PD-së, Policia thekson se mbajtja e protestës në këtë datë, që përkon me mbajtjen e Samitit BE-Ballkani Perëndimor në Tiranë, është rrezik për sigurinë kombëtare.
Në njoftimin e Policisë shkruhet se opozita mund ta zhvillojë protestën në një zonë tjetër, jashtë perimetrit të sigurisë, caktuar për mbarëvajtjen e Samiti.
“Vendosa të ndaloj zhvillimin e tubimit të kërkuar nga ana Juaj në datën 06.12.2022, ora 12.00 deri në orën 16.00, në vendin e përcaktuar në kërkesë. Drejtoria Vendore e Policisë Tiranë mbetet e angazhuar për të garantuar të drejtën e çdo qytetari për të marrë pjesë në tubime paqësore dhe mirëpret çdo njoftim Tuajin për zhvillimin e tubimit në një vend alternativ, jashtë perimetrit të sigurisë”, thuhet mes të tjerash në njoftimin e policisë.
Berisha njoftoi mbajtjen e protestës së radhës të opozitës më 6 dhjetor, ditë në të cilën do të mbahet në kryeqytet Samiti BE-Ballkani Perëndimor. Vendimi i Berishës është dënuar masivisht nga maxhoranca, duke e konsideruar atë si veprim kundër BE-së.
Njoftimi i plotë i Policisë:
Në përgjigje të njoftimit Tuaj nr.275 Prot, datë 22.11.2022, drejtuar Drejtorisë Vendore të Policisë Tiranë, me anë të cilës njoftoni për organizimin e një tubimi nga subjekti Partia Demokratike, në Bulevardin “Dëshmorët e Kombit”. përballë Kryeministrisë në datën 06.12.2022, ora 12.00 deri në orën 16.00, nisur nga fakti se;
Në këtë datë në Tiranë zhvillohet Samiti i Bashkimit Evropian për Ballkanin Perëndimor si dhe në konsultim me strukturat e sigurisë të delegacioneve pjesëmarrëse në këtë Samit, duke respektuar parametrat e sigurisë të Bashkimit Evropian, është përcaktuar perimetri i sigurisë, si më poshtë:
Bulevardi “Dëshmorët e Kombit” deri në Bulevardin “Bajram Curri” përfshi sheshin “Nënë Tereza
Rruga “Gjergj Filipi” nga kryqëzimi me rrugën “Ibrahim Rrugova” deri tek kryqëzimi me rrugën “Papa Gjon Pali II”;
Rruga ” Lek Dukagjini” në gjithë gjatësinë e saj;
Rruga “Dervish Hima”, rruga “Sheh Ahmet Pazar”, rruga “Faik Konica”, muga “Skerdilajd Llagami”.
Rruga “Papa Gjon Pali II” në gjithë gjatësinë e saj, rruga ” Asim Zeneli, rruga “Themistokli; Germenji”, rruga “Mustafa Matohiti”, rruga “Jul Variboba”, rruga ” Fatmir Haxhiu”;
Rruga “Ismail Qemali”, nga rruga e “Elbasanit” deri në kryqëzimin me rrugën “Ibrahim Rrugova”
Vendosa të ndaloj zhvillimin e tubimit të kërkuar nga ana Juaj në datën 06.12.2022, ora 12.00 deri në orën 16.00, në vendin e përcaktuar në kërkesë. Drejtoria Vendore e Policisë Tiranë mbetet e angazhuar për të garantuar të drejtën e çdo qytetari për të marrë pjesë në tubime paqësore dhe mirëpret çdo njoftim Tuajin për zhvillimin e tubimit në një vend alternativ, jashtë perimietrit të sigurisë. Ju sjellim në vëmendje se, për veprime në kundërshtim me ligjin, do të ndërmerren masa administrative dhe penale, në zbatim të gërmes “a”, neni 24, i Ligjit nr.8773, datë 23.04.2001 “Per Tubimet”, neni 262 i Kodit Penal të Republikës së Shqipërisë “Organizimi dhe pjesëmarrja në grumbullime e manifestime të paligjshme.