Ndërkohë që qytetarët gjermanë do t’i drejtohen nesër kutive të votimit për të zgjedhur Bundestagun e ardhshëm, Friedrich Merz është kandidati për kancelar i cili nga sondazhet rezulton si më favoriti.
Por kush është Friedrich Merz?
Sipërmarrësi ideologjikisht konservator Merz, 69 vjeç, pritet gjerësisht të bëhet kancelari i ardhshëm i Gjermanisë. I njohur për një qasje të drejtpërdrejtë ndaj politikës, Merz ka premtuar të rigjallërojë ekonominë në stanjacion të Gjermanisë, të ulë taksat dhe të shtrëngojë politikat e imigracionit, duke argumentuar se vendi duhet të bëhet më konkurrues në skenën globale.
Merz i ka bërë thirrje gjithashtu Gjermanisë që të rrisë shpenzimet e saj të mbrojtjes nga 50 miliardë euro aktuale në 80 ose 90 miliardë euro në vit, pas vitit 2028, duke përmendur shqetësimet për sigurinë evropiane dhe nevojën për t’iu kundërvënë agresionit rus.
Një hap ky i rëndësishëm pasi presidenti amerikan Donald Trump duket se po riorganizon politikën e jashtme të SHBA-së larg aleatëve dekada të vjetra të Amerikës në NATO.
“Nuk ka të bëjë vetëm me Ukrainën. Ka të bëjë me sigurimin e paqes në Evropë,” tha Merz gjatë një vizite të fundit në Kiev, ku ai ripohoi angazhimin e Gjermanisë për të mbështetur Ukrainën kundër agresionit rus.
Merz sheh një sfidë në rritje në marrëdhëniet e Gjermanisë me SHBA-në dhe ka paralajmëruar për një “çarje epokale” të mundshme nëse udhëheqja amerikane vazhdon në një rrugë të tillë.
Ai ka propozuar gjithashtu formimin e një grupi evropian të kontaktit të mbrojtjes, duke përfshirë Gjermaninë, Francën, Mbretërinë e Bashkuar dhe Poloninë, për të koordinuar strategjitë në mënyrë më efektive.
Merz ka mbështetur gjithashtu ligje më të ashpra të imigracionit dhe dëbimin e shpejtë të azilkërkuesve të dënuar për krime në Gjermani.
Cbsnews shkruan ndërsa gjermanët shkojnë në kutitë e votimit këtë fundjavë, ata në thelb do të zgjedhin midis vazhdimësisë dhe ndryshimit.