Turqia: Kemi nisur hetim për pretendimet e Rusisë për vjedhjen e grurit ukrainas

BOTA


Ministri i jashtëm i Turqisë, Mevlut Cavusoglu deklaroi të enjten se kishte nisur një hetim mbi pretendimet për vjedhjen e grurit të Ukrainës nga ana e Rusisë dhe se nuk do të lejohej që dërgesa të tilla të silleshin në Turqi.

Ambasadori ukrainas në Ankara tha në fillim të qershorit se kompani turke ishin midis blerësve që po merrnin dërgesat e grurit që Rusia kishte vjedhur në Ukrainë, duke shtuar se priste nga Turqia që të identifikonte dhe të arrestonte individët përgjegjës për dërgesat e përfolura.


Rusia i ka mohuar vazhdimisht pretendimet se po vidhte grurë nga Ukraina.

“Ne i marrim shumë seriozisht të gjitha pretendimet dhe po i hetojmë ato. Njoftojmë vazhdimisht, veçanërisht palën ukrainase mbi rezultatet e hetimeve”, deklaroi Cavasoglu gjatë një interviste të përbashkët për mediat në Ankara, me ministren e jashtme të Britanisë së Madhe, Liz Truss.

Cavusoglu tha se Turqia do të kundërshtonte Rusinë apo çdo shtet tjetër që merrte grurin ukrainas apo mallra të tjerë dhe i shiste ilegalisht në tregjet ndërkombëtare. “Ne si Turqi, nuk do të lejojmë që këto mallra të vijnë tek ne”, deklaroi ai./REL




Skip to toolbar