Ka zgjatur më shumë se dy orë seanca e mbrojtjes e Saimir Tahirit përpara trupës gjykuese në Gjykatën e Krimeve të Rënda, ku po zhvillohet procesi i gjykimit në ngarkim të tij për disa akuza. Sipas raportimeve të mediave nga seanca gjyqësore mësohet se Saimir Tahiri u ka drejtuar disa pyetje prokurorëve, që më herët kërkuan dënimin e tij me 12 vjet burg.
“Prokuroria më akuzon mua për 4 episode trafikimi droge. Por akuzat nuk kanë logjikë. Prokuroria më akuzon për raste të trafikimit në vitet; 2013, 2014, 2015. Ndërkohë që dy hetimet kronkrete, ndaj Taulant Haxhirajt dhe Moisi Habiljat kanë nisur në 2016”, mësohet të jetë shprehur Tahiri. Ish-ministri, ka pyetur prokurorët se “si ka mundësi që prokuroria mund të më akuzojë për sasi droge të kultivuara para se të merrja detyrën e ministrit?”.
Më tej, ish-ministri ka shtuar ngritur edhe pyetjet të tjera, duke i kërkuar prokurorisë që të fliste dhe publikonte fakte konkrete. Sipas Tahirit, se për episodin e parë që mendohet se ka favorizuar Habilajt, në tetor të vitit 2013, policia ka proceduar dy vëllezërit Florian dhe Moisi Habilaj për heqje të paligjshme të lirisë.
“Si mundet që unë t’i dërgoja ata në procedim për sa kohë i favorizoja në trafikun e drogës?!”, -mësohet të jetë shprehur Tahiri. Më tej, ai ka sqaruar edhe letrën që i ka dërguar Mimi Kodhelit për fikjen e radarëve. “Prokuroria e lë të mjegullt faktin se asokohe janë fikur radarët. Por unë në cilësinë e ministrit, i jam drejtuar as kohe me shkresën e datës 29/10/2013, (shkresë sekrete) koleges time, ministres Kodheli, duke e informuar se nuk punonin radarët”.
Gjatë kohës që ka bërë mbrojtjen, Tahiri ka përmendur edhe një letër porosi të Prokurorisë së Krimeve të Rënda, që ka kërkuar informacion për faturat e fjetjes në hotel të ish-ministrit. Sips News 24, mësohet se Tahiri është shprehur se hoteli më i shtrenjtë ku ai ka fjetur ka “qenë 140 euro, jo 900 euro si ajo tjetra”, duke iu referuar faturave të publikuara pak kohë më parë për ministren e drejtësisë.
“Prokuroria ka hetuar të gjithë lidhjet e mia shoqërore dhe ka pyetur me letër porosi, se c’ punë kishte këtë nuk e di. Ka cuar letër porosi dhe ka pyetur edhe për çmimet e hoteleve ku kam fjetur, në media u tha se unë flija në hotele me 1 mijë euro nata. Por ju garantoj se me letër porosi është garantuar se çmimi më i shtrenjtë i paguar si ministër, është vetëm 140 euro, jo si ajo tjetra që paguante 900 euro nata.” mësohet të jetë shprehur Tahiri.