Partia Socialiste Evropiane konfirmon se nuk dëshiron të ketë mes të ftuarve të tyre në Kongresin që do të mbahet në Berlin me 14 dh e 15 tetor, Ilir Metën në cilësinë e liderit të Partisë së Lirisë.
Pas e-mailit të publikuar dhe përpjekjes për përgënjeshtrim nga ana e PL-së që akuzoi gazetarët se shpërndajnë fake news të fabrikuara nga kundërshtarët e tyre politikë, konfirmimi i vërtetësisë së lajmit vjen për nga Giacomo Filibek, zëvendespresident i PES.
Përmes një lidhje telefonike nga Praga, ku po merr pjesë në takimin e Komunitetit politik Evropian, Filibek konfirmoi për Report TV se e ka dërguar atë email:
“Nuk e kam idenë nëse adresat email ishin të gabuara apo të sakta, por ju konfirmoj se Ilir Meta nuk është më i ftuar i dëshiruar në kongresin tonë si shkak i vendimit të tij për t’u bërë aleat me Sali Berishën”, tha ai.
Sali Berisha, i deklaruar person “non grata” nga Shtetet e Bashkuara dhe Bashkimi Europian, duket se është futur në listën e zezë edhe të gjithë kancelarive evropianë.
”Por Ilir Meta deklaron se nuk ka pasur asnjë qëllim për të marrë pjesë në kongresin tuaj”, e pyesim.
“Kjo nuk është e saktë, e megjithatë nuk ka asnjë rëndësi. Në të shkuarën ai është ftuar gjithnjë si i mirëpritur, herën e fundit në Kongresin e Lisbonës në dhjetor 2018, dhe ai ka pasur gjithnjë interes të mbajë marrëdhënie të mira me ne.
Tani gjërat kanë ndryshuar dhe ai nuk është më i ftuar të marrë pjesë për shkak të pozicionit të tij të ri politik”, deklaroi Filibek.