Pas mbylljes së takimit në Tropojë, kreu i qeverisë Edi Rama është nisur drejt Kukësit. Bashkë me të ka nisur edhe lëvizja e militantëve të PD, të cilët janë nisur t’i zënë pritë Kryeministrit pranë Aeroportit të Kukësit. Kjo ka bërë që edhe kreu i qeverisë të zhvendosë vendin e takimit elektoral, i cili ishte parashikuar të mbahej në qendër të qytetit.
Militantët e PD kanë bllokuar rrugën 3 kilometra pranë Aeroportit të Kukësit, duke krijuar disa incidente për shkak të përplasjeve me forcat e policisë. Në protestën e organizuar ka qenë edhe një grua e cila mbante në duar foton e Havzi Nelës, poetit të varur në kohën e diktaturës. Gjatë përplasjeve ajo është lënduar dhe ka humbur ndjenjat.
Kryeministri Edi Rama ka mbërritur në Aeroportin e Kukësit, me helikopter, ku pritet të zhvillojë takimin elektoral dhe të prezantojë kandidatin për kryetar bashkie për zgjedhjet e 30 qershorit.
Edhe në Tropojë, militantët e PD kanë pritur kreun e qeverisë Edi Rama me protesta. Ata janë mbledhur në sheshin pranë zonës ku kreu i qeverisë po mbante mittingun elektoral. Disa militantë janë ulur edhe në lulishten pranë sheshit. Forca të shumta policie kanë mbajtur situatën nën kontroll duke shmangur përplasjet.
