Epiteti që pati gjatë karrierës, tregon gjithçka.
Dikembe Mutombo mbiquhej “Mali”, dhe me të vërtetë ishte një nga basketbollistët më të fortë dhe më të pakalueshëm në NBA. Kjo legjendë e vërtetë, e ardhur nga Afrika, mbylli sytë në moshën 58-vjeçare pas një sëmundjeje të pashërueshme.
I lindur në Republikën e Kongos, ai u shua në Atlanta, në shtetin amerikan të Xhorxhas. Mutombo luajti për 18 sezone në basketbollin amerikan, duke u shquar për topat e kapur në tabelë dhe për bllokimin e gjuajtjeve të rivalëve.
Për këtë e ndihmonte shtatlartësia prej 2.18 metrash, dhe parametrat e shkëlqyer fizikë. Ai veshi fanelën e ekipeve si Denver, Atlanta, Filadelfia, Nju Xhersi, Nju Jork dhe Hjuston.
Tetë herë u zgjodh në Ndeshjen e Yjeve, katër herë u zgjodh mbrojtësi më I mirë I NBA-së, dy herë ishte numri 1 I kampionatit për topat në tabela dhe tre herë, më I miri për bllokimin e gjuajtjeve.
Në historinë e basketbollit amerikan, Mutombo është I dyti në renditjen e bllokimit të gjuajtjeve pas gjigandit tjetër, Hakim Olaxhuon.