Bosët e mëdhenj, përfaqësues të medias dhe teknologjisë, liderë të huaj… Pas fitores së tij të befasishme në 2016-ën, shumëkush e kishte përçmuar Donald Trumpin, por këtë herë me fitoren e zgjedhjeve presidenciale përballë Kamala Harris, personalitetet e botës së ekonomisë dhe medias po konkurrojnë për të qenë sa më pranë presidentit të sapozgjedhur.
Ky detaj nuk ka shpëtuar pa u vënë re nga Trump, i cili ka komentuar situatën duke thënë: “Gjatë mandatit tim të parë, e gjithë bota po më luftonte. Në këtë mandat gjithë bota dëshirojnë të jenë miqtë e mi”.
Komentin, Trump e bëri gjatë një konference për shtyp që dha nga rezidenca e tij në Mar-a-Lago, e para që nga ajo e natës së parë pasi u shpall President.
“Tani për tani, njerëzit mendojnë se është më mirë të jesh në krah të tij, por problemi për ta është se krahët e tij shpesh ndryshojnë“, paralajmëron Wendy Schiller, profesoreshë e shkencave politike në Universitetin Brown.
Pas zgjedhjes së tij më 5 nëntor dhe me përjashtim të disa udhëtimeve të shkurtra, për shembull për rihapjen e Notre Dame, Donald Trump ka mirëpritur vizitorët në këtë kompleks të gjerë bregdetar, me palma dhe me dekorim luksoz.
Ky është një klub privat, tarifa vjetore për të cilën, sipas shtypit, u rrit shumë verën e kaluar dhe tani arrin në 1 milion dollarë në vit. Aty Donald Trump ka ftuar ministrat e tij të ardhshëm për takime dhe një raundi golfi.
Po ashtu në Florida, presidenti që do të betohet më 20 janar, shtroi një darkë për shefin e META-s, Mark Zuckerberg, kompanisë mëmë të rrjetit social Facebook, i cili ia kishte ndaluar aksesin aty pasi mbështetësit e Trump sulmuan Capitol Hill më 6 janar 2021.
Të hënën, miliarderi 78-vjeçar e zgjeroi më tej listën, duke thënë se ai takoi gjithashtu në Mar-a-Lago edhe shefin e Google, Sundar Pichai dhe CEO-n e kompanisë Apple, Tim Cook.
Kreu i gjigantit farmaceutik Pfizer, Albert Burla, po ashtu vizitoi Mar-a-Lagon, dhe kur Donald Trump u ftua së fundmi për t’i rënë ziles që sinjalizon fillimin e tregtimit të aksioneve në Wall Street, emra të tjerë të mëdhenj ishin të pranishëm.
“Dhe ne do të kemi gjithashtu Jeff Bezos, nga Amazon, i cili do të shkojë këtë javë për ta takuar Trump. Kemi shumë shefa të mëdhenj, bosët më të mëdhenj, bankierët më të mëdhenj, e gjithë bota po thërret”, siguroi republikani, duke përsëritur se është pikërisht e kundërta e asaj që kishte përjetuar pasi fitoi Shtëpinë e Bardhë dhe gjatë mandatit si President nga 2017 deri në 2021.
Liderë të huaj gjithashtu kanë pasuar njëri-tjetrin në rezidencën në Florida, e cila është kthyer në qendrën e vërtetë të pushtetit të ri. Disa janë simpatizues republikanë, si kryeministri hungarez Viktor Orbán apo presidenti argjentinas Javier Millay.
Por kryeministri kanadez Justin Trudeau dhe shefi i ri i NATO-s Mark Rutte u panë gjithashtu duke hyrë aty, secili me arsye për t’u shqetësuar për vendimet e ardhshme të presidentit të zgjedhur.
Nëse vizitorë të profilit të lartë po vërshojnë në Florida, kjo ndodh sepse ata presin, me të drejtë ose gabimisht, një presidencë më të strukturuar dhe vendimtare “Trump 2.0”.
Donald Trump “ka bërë të ditur se do të përdorë të gjitha kompetencat e presidencës për t’u marrë me këdo që e sfidon atë, dhe tani ai duket se ka një ide më të qartë se si ta bëjë këtë, dhe gjithashtu ka imunitet nga Gjykata e Lartë që e mbron atë” për sa kohë që është në Shtëpinë e Bardhë, shpjegon Wendy Schiller.