Pas përfundimit të protestës së djeshme të Partisë Demokratike përpara Kryeministrisë, policia ka bërë një bilanc me protestuesit e arrestuar dhe efektivët e lënduar.
Bëhet me dije se 21 persona janë ndaluar për dhunën gjatë protestës mbrëmë, ndërsa 19 efektivë janë shtruar në spital, pas lëndimeve që kanë marrë. Dy prej tyre mësohet se janë në gjendje të rëndë.
Mes protestuesve të arrestuar, 7-8 prej tyre janë të mitur. Protestuesit kanë qenë të ndaluar edhe më herët për vepra të ngjashme penale.
Nën hetim për këtë tubim janë vendosur pesë anëtarë të Partisë Demokratike, Sekretari Organizativ Ervin Minarolli, si dhe katër deputetët Flamur Noka, Belind Këlliçi, Luçiano Boçi dhe Klevis Balliu.
Njoftimi i Policisë së Tiranës:
Në vijim të veprimeve hetimore dhe procedurale të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, mbi tubimin e zhvilluar më datë 10.02.2026, në bulevardin “Dëshmorët e Kombit”, specialistët për Hetimin e Krimeve të Komisariatit të Policisë Nr. 1:
-arrestuan në flagrancë shtetasit: K. Ç., 36 vjeç; K. B., 24 vjeç; L. T., 21 vjeç; K. S., 26 vjeç; Xh. V., 18 vjeç; R. N., 28 vjeç; S. D., 48 vjeçe, F. N., 32 vjeç; A. K., 24 vjeç; F. A., 22 vjeç; G. D., 21 vjeç; D. K., 27 vjeç; J. K., 18 vjeç; A. K., 20 vjeç; O. H., 18 vjeç; S. P., 18 vjeç; A. U., 24 vjeç, dhe katër shtetas 17 vjeç, për veprat penale “Goditja për shkak të detyrës”, “Plagosja e rëndë me dashje”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr” dhe “Kundërshtimi i punonjësit të rendit publik”;
-referuan materialet në Prokurori ku nisi procedimi në gjendje të lirë shtetasin E. K., 32 vjeç, banues në Tiranë, për veprat penale “Prishja e rendit dhe qetësisë publike” dhe “Kundërshtimi i punonjësit të Policisë së rendit publik”.
Gjithashtu, u referuan materialet në Prokurori ku nisi procedimi në gjendje të lirë për shtetasit:
-E. M., sekretar organizativ i Partisë Demokratike, për veprat penale “Organizimi dhe pjesëmarrja në grumbullime dhe manifestime të paligjshme” dhe “Shtytja e të miturit në krim”;
-B. K., K. B., L. B. dhe F. N., anëtarë të Partisë Demokratike, për veprat penale “Kundërshtimi i punonjësit të Policisë së rendit publik” dhe “Shtytja e të miturit në krim”;
-u shpall në kërkim shtetasi L. P., 41 vjeç. Po punohet për kapjen e tij.
Pasditen e djeshme, protestuesit janë mbledhur fillimisht në bulevardin “Dëshmorët e Kombit”, para Kryeministrisë. Më pas, ata janë zhvendosur drejt Kuvendit, ku gjatë gjithë kohës së zhvillimit të tubimit, kanë hedhur lëndë djegëse, mjete piroteknike dhe sende të forta në drejtim të punonjësve të Policisë dhe godinave të institucioneve publike.
Si pasojë e sulmeve me sende të forta, mjete piroteknike dhe molotov ndaj punonjësve të Policisë dhe godinave të institucioneve shtetërore, janë dëmtuar 16 punonjës policie, të cilët morën ndihmë mjekësore në spital dhe janë jashtë rrezikut për jetën.
Në cilësinë e provës materiale janë sekuestruar 22 molotovë të pashpërthyer dhe 3 shishe me lëndë të dyshuar djegëse benzinë, që janë gjetur nga shërbimet e Policisë, afër Kuvendit.
Strukturat hetimore të Drejtorisë Vendore të Policisë Tiranë, në drejtimin e Prokurorisë, vijojnë punën për identifikimin dhe kapjen e shtetasve të tjerë të përfshirë në akte të dhunshme gjatë tubimit.
Materialet procedurale iu referuan Prokurorisë, për veprime të mëtejshme.
Kujtojmë se gjatë mbrëmjes së djeshme, më 10 shkurt, Partia Demokratike organizoi tubimin e saj të dytë të madh kombëtar, i cili u karakterizua nga tensione dhe përplasje të ashpra mes protestuesve dhe forcave të policisë. Në dy vendet kryesore të tubimit, para Kryeministrisë dhe pranë ndërtesës së Parlamentit, turma e protestuesve përdori mjete të ndryshme të dhunës, duke përfshirë lëshimin e bombave molotov, hedhjen e gurëve dhe sendeve të forta drejt kordonit të policisë. Si përgjigje ndaj këtyre sulmeve, forcat e rendit përdorën ujë dhe gaz lotsjellës për të kontrolluar dhe shpërndarë turmën.
Hedhja e vazhdueshme e molotovëve nga protestuesit e bëri situatën shumë të rrezikshme, ndërsa policia përpiqej të ruante rendin dhe të pengonte përparimin e turmës drejt ndërtesave shtetërore. Si pasojë e përplasjeve, disa punonjës të policisë u lënduan dhe u detyruan të transportoheshin me ambulancë për trajtim mjekësor.
Përplasjet zgjatën për rreth dy orë, gjatë të cilave protestuesit përpiqeshin të afrohen drejt godinës së Parlamentit dhe kordonit të sigurisë, por çdo tentativë përparimi u ndalua nga ndërhyrja e policisë, e cila përdori ujë dhe gaz lotsjellës për të shpërndarë turmën.
Protesta u mbyll në mënyrë graduale, kur turma u tërhoq drejt selisë së Partisë Demokratike, dhe tubimi u përmbyll me një mesazh të kryedemokratit Sali Berisha drejtuar mbështetësve të tij.