Me porosi të presidentit turk Erdogan do të ndërtohen 500 shtëpi të reja në zonën e Laccit në kuadër të procesit të rindërtimit pas dëmeve të shkaktuara nga tërmeti i 26 nëntorit. Kryeministri Edi Rama priti mëngjesin e të shtunës në një takim ministrin turk të Mjedisit dhe Urbanistikës, Murat Kurum, me të cilin nënshkroi marrëveshjen e bashkëpunimin për ndërtimin e 500 banesave nga Turqia dhe premtoi se banesat që do të ndërtohen do të jenë më të mira dhe më cilësore se shtëpitë që u shembën nga tërmeti.
“Si dhe është bërë e ditur dje gjatë një konference për shtyp tani jemi në fazën e dytë të këtij projekti dhe kemi ardhur në fazën e nënshkrimit të këtij bashkëpunimi. Janë 500 njësi të reja banimi që do ndërtohen nga miqtë e ardhur nga Turqia me porosi të presidentin Erdogan në zonën e Laçit që njerëzit të kthehen në shtëpi më të mira se ato që kanë pasur. Ky është zëvendësimi i godina të rrënuara dhe do të jetë një transformim i rëndësishëm i gjithë situatës urbane.
Agjencia e angazhuar për këto 500 njësi, do vazhdojmë me një plan zhvillimi për të gjithë infrastrukturës. I japim zgjidhje edhe përmbytjeve në zonën e Laçit. Të dyja palët do ndajnë punën dhe në një kohë të shkurtër do krijojmë në shembull. E falënderoj me shumë mirënjohje ministrin dhe gjithë delegacionin që ka ardhur bashkë me të dhe përfaqësues të specializuar në programin e ndërtimeve me karakter social në Turqi”, tha Rama.
Ndërsa ministri turk tha se shpresojnë që brenda muajit janar të marrin në dorëzim truallin ku do të ndërtohen banesat dhe të nisë menjëherë puna.
“Ju kam sjellë përshëndetjet e përzemërta të Erdogan. Ne u ndodhëm sa më pranë vëllezërve tanë shqiptarë. Ekipet tona erdhën dhe bënë përpjekje për të ndihmuar sa më shumë njerëz. Ekipet tona kanë verifikuar në terren 600 njësi dhe kemi ofruar ndihma të veçanta. Më pas presidenti Erdogan dha porosi për të ndërtuar 500 banesa të reja. Jemi këtu në kuadër të këtij procesi dhe deri në fund të Janarit autoritet shqiptare të na dorëzojnë truallin ku do të bëhet ndërtimi. Do të jetë një lagje shembullore, dhe ndërtimi do të përshtatet me arkitekturën dhe traditën shqiptare. Ne do firmosim protokollin e parë për realizimin e këtij projekti dhe jemi të gatshëm për t’i ardhur në ndihmë Shqipërisë edhe në çështje të tjera. Ato që ne kemi bërë deri tani do vazhdojmë të bëjmë edhe në të ardhmen në kuadër të marrëdhënieve vëllazërore mes dy vendeve”, tha ministri turk.