Mjeku i njohur, Artan Koni pohoi se sistemi shëndetësor në Shqipëri nuk vuan vetëm nga pandemia e koronavirusit, ndërsa nënvizoi faktin se po neglizhohen sëmundjet e tjera të rrezikshme.
I ftuar në emisionin ‘Real Story’ në ‘News24’, Koni tha se mjekët nuk i shqetëson shifrat e rasteve me COVID se sa ku është gjendja e shëndetësisë në vend, duke marrë parasysh mungesën e kapaciteteve spitalore, vonesa me bërjen dhe përgjigjet e tamponëve.
“Sa i përket shifrave në total, nuk besoj se janë shqetësuese. Ne shqetësohemi kur shohim shëndetësinë në këtë gjendje. Kemi më pak mjekë, kemi mangësi në spitale, në bërjen e tamponëve, vonesa në përgjigjen ndaj pacientit. Këto na bëjnë të vështirë që të shqetësohemi. Kemi probleme dhe sëmundjet e tjera. Të jeni i sigurt se koha ndaj një ndërhyrje ndaj një pacient kardiak, tani është disa minuta, mos të them disa orë. Themi; ‘ujku, ujku’, çakalli po bën kërdinë. Ka shumë operacione që shtyhen. Shërbimet e tjera kanë pak më të dobëta. Shqetësimi ynë si mjekë është se po vjen ezaurimi i kapaciteteve. Evitimi i spitaleve me thënë të drejtën nuk është i drejtë. Shpesh se disa njerëz e kanë këtë perceptim. Nuk duhet të jetë kështu. Ata që mendojnë; “Më mirë të vuash dhe të bësh mjekimin në shtëpi se sa në spital”. Njerëzit më shumë shqetësohen nga ajo që dëgjojnë. Një pjesë e mirë janë gojëdhëna. Është informacion i paselektuar.”, tha mjeku.