Prokuroria e Posaçme ka relatuar para Gjykatës së Posaçme konkluzionet përfundimtare për Sonila Qaton Ish-drejtoreshën e ARRSH-së dhe të pandehurit e tjerë.
Spak ka kërkuar dënimin e Qatos me 1 vit burgim dhe për 5 vite të mos ushtrojë asnjë funksion publik, sipas gazetares së Top Channel, Anila Hoxha.
Për Simon Prendin është kërkuar 2 vjet burg dhe për 3 vite të tjera të mos ushtrojë asnjë funksion publik.
Prokuroria ka kërkuar për Elona Gogon 1 vit burg dhe për 5 vite të tjera jashtë funksioneve publike.
Erdit Salillari rrezikon 9 muaj burg dhe 5 vite jashtë funksioneve publike. Për Admir Pahumin Spak ka kërkuar 1 vit burg dhe 3 vite dënim plotësues.
Për Nikollaq Mihalin Spak kërkon dënimin me 8 muaj dhe 3 vite jashtë funksioneve publike.
Për Miranda Shkurtin 16 muaj shërbim prove dhe 3 vite jashtë funksioneve publike.
Për Arbër Trokën Spak ka kërkuar dënimin me 2 vjet burg dhe për 3 vite të mos ushtrojë asnjë funksion publik.
Për Almir Hoxhajn Spak ka kërkuar 2 vite burgim dhe për 3 vite të tjera të mos ketë funksione publike.
Për Arjana Hasanin Spak ka kërkuar 4 vite shërbim prove dhe për 5 vite të mos ushtrojë asnjë funksion publik. Ata dyshohen për shkelej të barazisë në tendera dhe falsifikim dokumentesh.
Ish-drejtoresha e ARRSH, Sonila Qato dhe anëtarë të komisionit të vlerësimit të ofertave konsiderohen nga SPAK në shkelje të detyrës për përzgjedhjen e një tenderi për aksin rrugor Kardhiq-Delvinë.
Qato mbajti për nëntë muaj detyrën e drejtoreshës së autoritetit rrugor shqiptar deri në shtator 2019 kur dhe dha dorëheqjen në kulmin e një përplasjeje me një subjekt privat.
Kujtojmë se Kontrolli i Lartë i Shtetit kallëzoi në Prokurori në vitin 2020 ish-drejtoreshën për abuzim 5 milionë euro me tenderin e rrugës Kardhiq- Delvinë.
Pas auditimit të tenderit, KLSH kërkoi hetim të thelluar penal ndaj Qatos, duke e akuzuar se ka skualifikuar pa të drejtë ofertën më të ulët, atë të paraqitur nga një prej kompanive.
Tenderi për lotin e 7, të rrugës Kardhiq-Delvinë, u zhvillua nga Autoriteti Rrugor Shqiptar, në qershor të vitit 2019.
Në garë morën pjesë 6 kompani, dhe ofertat e paraqitura prej tyre variuan nga 15 deri në 19 milionë euro, pa përfshirë tatimin mbi vlerën e shtuar.
ARRSH skualifikoi 5 ofertat më të ulëta, me pretendimin se nuk përmbushnin kriteret teknike duke shpallur fituese ofertën më të lartë, përkatësisht atë të një kompanie italiane, pas të cilës qëndronte një kompani shqiptare.
Kjo kompani kishte ofruar ta ndërtonte tunelin për 19 milionë euro pa përfshirë tatimin mbi vlerën e shtuar ose 4 milionë euro më shumë se sa oferta më e ulët e dhënë nga kompania.
Sipas Kontrollit te Lartë të Shtetit për katër kompani skualifikmi ka qenë i drejtë pasi nuk përmbushnin kriteret, ndërsa oferta më e ulët është skualifikuar në kundërshtim me ligjin. Dëmi sipas KLSH vlerësohet plot 5 milion euro duke përfshirë tatimin mbi vlerën e shtuar.
Përplasjet për tenderin e rrugës Kardhiq-Delvinë,çuan ne largimin e Qatos nga drejtimi i ARRSH-së.
Ky është kallëzimi i dytë penal ndaj saj, pasi më parë ajo është kallëzuar penalisht edhe nga një kompani, dosje që ndodhet për hetim në SPAK.