Tajvani është një çështje e brendshme e Kinës dhe nuk lejon ndërhyrje të jashtme. Kështu deklaroi presidenti kinez Xi Jinping, në festimet për 110 vjetorin e Revolucionit që përmbysi dinastinë e fundit perandorake të Kinës në 1911.
“Ndarja e Tajvanit është pengesa më e madhe për ribashkimin kombëtar, një kërcënim serioz për përtëritjen kombëtare. Kushdo që dëshiron të tradhtojë dhe ndajë vendin do të gjykohet nga historia dhe nuk do të përfundojë mirë,” shtoi Xi, duke siguruar se ribashkimi i plotë i vendit do të bëhet dhe mund të arrihet.
“Zgjidhja e Tajvanit përcaktohet nga tendenca e përgjithshme e historisë kineze, por më e rëndësishmja, është vullneti i përbashkët i të gjithë popullit kinez. Bashkimi kombëtar me mjete paqësore i shërben më së miri interesave të kombit kinez në tërësi, përfshirë edhe bashkatdhetarët e Tajvanit”, tha Xi.
“Bashkatdhetarët në të dy anët e Ngushticës së Tajvanit duhet të qëndrojnë në anën e djathtë të historisë dhe të bashkojnë duart për të arritur ribashkimin e plotë të Kinës dhe përtëritjen e kombit kinez, por ata që harrojnë trashëgiminë e tyre, tradhtojnë atdheun e tyre. Dhe ata përpiqen të ndajnë vendin, ata nuk do të kenë një fund të mirë”, vazhdoi Xi, duke shtuar se ata do të përçmohen nga njerëzit dhe do të dënohen nga historia.
“Askush nuk duhet të nënvlerësojë vendosmërinë, gatishmërinë dhe aftësinë e popullit kinez për të mbrojtur sovranitetin dhe integritetin territorial,” paralajmëroi presidenti.
Në përgjigje, zyra presidenciale e Tajvanit tha se e ardhmja e saj ishte në duart e njerëzve të saj.
Tajvani e konsideron veten një shtet sovran. Sidoqoftë, Kina e sheh Tajvanin si një provincë të shkëputur.
Pekini nuk ka përjashtuar përdorimin e mundshëm të forcës për të arritur bashkimin.
Ndërhyrja e zotit Xi vjen pas një vale prej rreth 150 fluturimesh ushtarake kineze në zonën e mbrojtjes ajrore të Tajvanit gjatë javës së kaluar.
Deklarat e fundit e presidenti kinez ishte më pajtuese sesa ndërhyrja e tij e fundit e madhe ndaj Tajvanit në korrik, ku ai u zotua të “shkatërronte” çdo përpjekje për pavarësinë zyrtare të Tajvanit.