Author: albi

“Ligjshmëria dhe rendi publik janë në themel të demokracisë dhe shtetit të së drejtës”.

Kështu deklaron ambasada e OSBE-së në Tiranë në një reagim për vrasjen e të riut Klodian Rasha dhe protestat që mbahen prej tre ditësh jo vetëm në kryeqytet. OSBE bën thirrje për përmbajtje nga çdo lloj dhune, në mënyrë që të lejohet ligji të veprojë.

“Prezenca e OSBE-së në Shqipëri shpreh keqardhjen e saj të thellë për vdekjen e Klodian Rashës dhe besimin se ajo do hetohet si duhet. Mendimet dhe lutjet tona janë për familjen e tij. Tani, ne bëjmë thirrje për përmbajtje nga çdo lloj dhune dhe që të lejohet ligji të veprojë”, deklaron OSBE.

Ambasadori gjerman në Tiranë Peter Zingraf, me anë të një deklarate për mediat shprehet se vdekja e të riut Klodian Rasha e ka prekur shumë.

Zingraf shprehet se ngjarja duhet të zbardhet plotësisht, ndërsa shton se dhuna nuk është zgjidhje.

Postimi i ambasadorit gjerman Peter Zingraf:

+++ Deklaratë e Ambasadorit Peter Zingraf +++

„Ngjarjet e ditëve të fundit më mbushin me shqetësim dhe trishtim. Vdekja e të riut më ka prekur edhe mua shumë. Është e rëndësishme dhe e drejtë, që kjo ngjarje të zbardhet plotësisht. Mendimet e mia janë pranë familjes së viktimës.

Por ajo çka na mëson gjithashtu ky rast tragjik është – dhuna nuk mund të jetë zgjidhja. Ushtrimi i lirë i të drejtës për protesta është thelbësor për çdo demokraci. Por, edhe kur bëhet fjalë për gjëra shumë emocionale dhe elementare: vetëm protestat paqësore legjitimohen si demokratike. Unë i bëj thirrje të gjitha palëve, të heqin dorë nga dhuna.“

Ambasadorja amerikane në Tiranë Yuri Kim ka reaguar për vrasjen nga policia të Klodian Rashës. Kim thekson se vdekja e të riut është një tragjedi, duke shprehur ngushëllime për familjarët dhe të afërmve të tij.

Kim thekson se ka takuar për rastin kryeministrin Edi Rama, kreun e PD Lulzim Basha, kryetaren e LSi Kryemadhi, duke shtuar se ata që janë në pushtet kanë përgjegjësi të sigurojnë një hetim të plotë dhe transparent të incidentit, të ushtrojnë përmbajtje në mbrojtjen e sigurisë dhe pronës publike, si dhe të sigurojnë përgjegjësi në të gjitha rastet.

“Vdekja e Klodian Rashas është një tragjedi dhe ne i shprehim ngushëllimet më të thella familjes dhe miqve të tij. Ambasadorja Kim bisedoi sot me Kryeministrin Rama, Drejtorin e Policisë Veliu, Kryetarin e Partisë Demokratike Basha dhe Kryetaren e Lëvizjes Socialiste për Integrim Kryemadhi, për të diskutuar mbi të drejtat e qytetarëve dhe përgjegjësitë e udhëheqësve. Ajo nënvizoi se ata që janë në pushtet kanë përgjegjësinë të sigurojnë një hetim të plotë dhe transparent të incidentit, të ushtrojnë përmbajtje në mbrojtjen e sigurisë dhe pronës publike, si dhe të sigurojnë përgjegjësi në të gjitha rastet.

Në këtë drejtim, ne vërejmë se autoritetet kanë kapur oficerin në fjalë dhe kanë nisur hetimet. Ata që kërkojnë të jenë në pushtet duhet të shfaqin aftësinë e tyre për të udhëhequr në një mënyrë të përgjegjshme, përfshirë edhe duke refuzuar dhunën. Ata që kanë qenë në pushtet më parë nuk duhet të bëjnë gabimet e së kaluarës, duke sugjeruar se dhuna është e pranueshme. Ambasada e Shteteve të Bashkuara u bën thirrje të gjitha palëve të tregojnë përmbajtje, në përputhje me përgjegjësitë e tyre, në mënyrë që të drejtat e të gjithë qytetarëve shqiptarë të mbrohen, dhe që zërat e tyre, përfshirë atyre në protestë, të kenë mundësi të shprehen dhe të dëgjohen pa dhunë”, shprehet ambasadorja Yuri Kim.

Gjykata e Shkallës së Parë Durrës ka pranuar sot kërkesën për pushimin e hetimeve në ngarkim të ish-drejtorit të kadastrës Liridon Pula dhe Shefes së zyrës Juridike Lusiena Kolaj ndaj procedimit penal 1976 te vitit 2019.

Lusiena Kolaj u ndalua në 20 shtator 2019, ishte gjykata e Apelit ajo që i nxori veprimet e kryera nga ana e prokurorit Arjan Ndoji si të paligjshme dhe vendosi rikthimin e saj në detyrë duke e lënë në masën detyrim paraqitje.

Liridon Pula u la në arrest me burg nga ana e gjyqtares Besjana Garxenaj duke mos u shqyrtuar asnjë provë e fakt në lidhje me ngjarjen në fjalë, masë të cilën e ndryshoi gjykata e Apelit Durrës.

Sot Liridon Pula dhe Lusiena Kolaj fituan betejën e tyre ndaj veprimeve të para hetimore ku ata ngritën zërin e tyre se veprimet e mara nga ana e prokurorisë së Durrësit ishin arbitrare dhe të kundraligjshme.

Theksojmë se për ngjarjen reagoi kryeministri i vendit dhe zv. kryeministri ishte prezent në seancën e masës së sigurimit të bërë në 2019.

Vendimi për pushimin e hetimeve ndaj Liridon Pulës dhe Lusiena Kolaj u dha sot në orën 15:00 nga gjyqtar Rexhep Bekteshi.

Pushimi i hetimeve çoi në përfundimin se këta dy shtetas nuk kanë kryer vepër penale dhe nuk ka asnjë fakt të shpërdorimit të detyrës.

Kreu i qeverisë Edi Rama del me paralajmërim për qytetarët para nisjes së natës së tretë të protestave pas vrasjes së Klodian Rashës. Rama i bën thirrje prindërve të minorenëve pjesëmarrës në protestë që sipas tij po abuzohen nga LSI, nga kthetrat e tyre.

Ai paralajmëron se për ata që do të marrin rrugët për të thyer dhe djegur që loja e forcës me ligjin dhe shtetin do të përfundojë pas hekurave. Sipas kreut të qeverisë pas protestave fshihen presidenti dhe opozita, të cilët sipas tij janë jo vetëm nxitësit,po edhe orkestruesit e dhunës që poshtëron kujtimin e Klodianit.

“Opozita dhe Presidenti janë jo vetëm nxitësit,po edhe orkestruesit e dhunës që poshtëron kujtimin e Klodianit, gjoja për drejtësi por në fakt vetëm për hesapet politike të LulitSaliutIIliritMonikës! Janë të dëshpëruar se s’kanë asnjë shans të rikthehen në pushtet me zgjedhje!

S’kanë më njësi komunale për të mbushur autobuzë, e dinë që përveç turmës së tkurrur të militantëve s’i ndjek më askush dhe paguajnë lart e poshtë deri edhe minorenë, duke u kërkuar të thyejnë e djegin rrugëve të qytetit, që të thonë ja s’ka rend, s’ka siguri, s’ka shtet..

Dhe ndërkohë që polici fajtor del para gjykatës,ministri i brendshëm jep dorëheqjen(edhe pse aspak fajtor, po qytetar fisnik që njeh ndjesën),Saliu krenohet si ka vrarë e si do vriste akoma, Iliri akuzon policinë, Monika shpërndan gurët, Luli ha përshesh e pret të bëhet dhëndër!

Thirrja ime për prindërit e minorenëve të abuzuar nga LSI është ruajini fëmijët nga kthetrat e të paudhëve pa atdhe, ndërsa për këdo tjetër që merr rrugët për të thyer e për të djegur, duhet të jetë shumë e qartë që loja e forcës me ligjin e me shtetin mbaron prapa hekurave!”, shkruan Rama