Author: albi

Kryeministri Rama ka bërë një paralajmërim të fortë për Presidentin Meta, ku të dielën nga Burreli ka deklaruar se me anulimin e dekretit të 30 qershorit, presidenti Ilir Meta e humbi të drejtën për të qëndruar në zyrën e tij.

Në takimin elektoral me simpatizantët e PS në Burrel, teksa prezantonte kandidatin Agron Malaj, Kryeministri Rama është shprehur se dekreti i presidentit është një akt nul dhe nuk i ndalon zgjedhjet e 30 qershorit.

“Dje papritur u shfaq shpëtimtar i atyre që kishin mbajtur atje në rrugë, presidenti i Republikës duke paralajmëruar një akt që politikisht është vetëvrasjes, ligjërisht është nul dhe moralisht është turp dhe s’ka më turp dhe mos u çudisni nëse ju them se nga fronti shpëtimtar i opozitës nuk është çmenduria e fundit, do ketë edhe gjëra të tjera. Do apo s’do Saliu, do apo s’do fallxhorja, zgjedhjet do mbahen në 30 qershor. Kushtetuta nuk është filxhan që e rrotullon nga të duash. Dje Ilir Meta  e ka shkuar fatin e tij si një president që e ka humbur të drejtën të qëndrojë në këtë zyrë dhe jo sepse kështu them unë por sepse kjo që shikoni është dhe do jetë pasqyra e një të vërtete, që do t’iu bëhet shumë e qartë. Kjo luftë nuk është për bashkitë. Gjithë kjo orvatje për ta çuar Shqipërinë në orvatje nuk bëhet për disa bashki, por sepse kërkohet një pazar për të varrosur reformën në drejtësi, kërkohet rrëmujë për të goditur të vetmen forcë që do të jetë mbështetësja e reformës në drejtësi dhe e zbatimit të saj për të kaluar nga ligjet te gjyqet. Ilir Meta mund të bëjë një dekret për t’i shpallur luftë Amerikës, por kjo është e palogjikshme”, tha Rama nga Burreli.

Nuk dihet nëse ky paralajmërim i Ramës i paraprin një kërkese për shkarkimin e Presidentit Ilir Meta. Shkelja e Kushtetutës është një nga pikat e parashikuara në Kushtetutë, ku Partia Socialiste mund të kërkojë shkarkimin e Presidentit. Për shkarkimin e Presidentit Meta duhet një propozim me të paktën ¼ e deputetëve të Kuvendit të Shqipërisë dhe duhet të votohet me të paktën nga 2/3 e deputetëve të parlamentit.

Ministrja e Mbrojtjes Olta Xhaçka foli nga Burreli lidhur me vendimin e presidentit Ilir Meta për anulimin e 30 qershorit. Ajo tha se zgjedhjet nuk mund t’i ndalojë as opozita me molotov në shesh dhe as ndonjë nga krerët e opozitës në presidencë.

“Nuk ka pasur asnjëherë një dallim mes asaj që përfaqësojmë ne dhe ata. Këto nuk janë thjeshtë zgjedhjet lokale, por një referendum për t’i dhënë fund tranzicionit. Një grup i vogël politikanësh kanë vënë para interesat e tyre. Zgjedhjet do të mbahen në 30 qershor, jo se e tha kryeministri, por sepse e parashikon Kushtetuta. Këtë nuk e ndal dot as opozita me molotov në shesh dhe as ndonjë nga krerët e opozitës në presidencë”, tha Xhaçka.

Partia Demokratike ka marrë në mbrojtje Presidentin Meta për shfuqizimin e dekretit, duke shtyrë datën e zgjedhjeve, pasi sipas kësaj force politike vendi po shkonte në konflikt civil, ndërkohë që ka paralajmëruar Ramën se nuk do të lejohen votime më 30 qershor. Ish-deputeti i PD, Edi Paloka thotë se vendimi i presidentit për anulimin e zgjedhjeve lokale është ndërmarrë për shkak se vendi po shkonte drejt një konflikti civil, megjithëse nuk përmend nëse është vendim në përputhje me Kushtetutën, apo e cenon atë. Madje, sipas Palokës, nga ky vendim është përfiton më shumë Rama. Paloka këmbëngul se më 30 qershor nuk do të ketë as zgjedhje as votime, duke lënë të kuptuar se shqiptarët janë gati për çdo lloj skenari nëse kryeministri përpiqet t’i mbajë zgjedhjet.

“Vërtete nuk kupton apo Ben sikur…Vendimi i Presidentit për ç’dekretimin e zgjedhjeve kuptohet qe është ndërmarrë kur dukej qartë se vendi po shkonte drejt një konflikti civil të pashmangshëm. Po ai që përfiton më shumë nga ky vendim në fakt është Edvini. Nuk e kupton apo bën sikur nuk kupton?! Zoti ia shtoftë inatin dhe budallallëkun”, shkruan Paloka. Madje, ai vijon edhe më tej, duke paralajmëruar PS-në se me 30 qershor nuk do të ketë votime, ndryshe, ai “kërcënon” se shqiptarët janë gati. “Me 30 qershor nuk ka as zgjedhje e as votime! Për çdo gjë tjetër që do kërkojë Edvini, shqiptarët janë gati”, shkruan Paloka.

Kreu i PD, Lulzim Basha ka reaguar të dielën, duke deklaruar se zgjedhjet e 30 qershorit janë anuluar, por ndryshe nga herët e tjera që në mbyllje të protestës, njoftonte protestën e radhës, këtë herë duket se është tërhequr nga protestat. Duket se dekreti i Presidentit para protestës së djeshme e ka qetësuar opozitën, pasi edhe nga kampi i LSI, ende nuk ka asnjë deklaratë për protesta.

Në një mesazh në Facebook, Basha, duke hedhur një album me foto nga protesta e shtunës, ka deklaruar se beteja e PD do të vazhdojë, por pa dhënë një datë për protestën e radhës.

“Boll më me Shqipërinë që duan ata, tani është koha të luftojmë për Shqipërinë e të gjithë shqiptarëve! Ora e Shqipërisë si e gjithë Europa po troket dhe nuk ka forcë ta ndalë! Falë vendosmërisë tuaj të pathyeshme, falë bashkimit të zemrave dhe mendjeve të shqiptarëve të lirë, zgjedhjet farsë të 30 Qershorit u anuluan! Beteja jonë do të vazhdojë deri në triumfin e standardeve dhe vlerave europiane. Pengesa e vetme për në Europë është sundimi i shtetit të bërë njësh me krimin, është qeveria e ardhur me votën e krimit, është kryeministri i Avdylajve. Largimi i Ramës është i panegociueshëm”, ka deklaruar Basha.

Kreu i Bashkisë Tiranë ka deklaruar sot nga Baldushku, ku ka zhvilluar takime elektorale se Shquzimi i dekretit nga Presidenti është akt nul dhe zgjedhjet vendore do mbahen në 30 qershor. Kandidati i Partisë Socialiste për Bashkinë e Tiranës, Erion Veliaj deklaroi se nuk ka asnjë dyshim që zgjedhjet vendore do mbahen në 30 qershor dhe qytetarët e Tiranës do të votojnë për vijimin e transformimit që ka pësuar kryeqyteti në këto 4 vite.

 “Në 30 qershor do kemi zgjedhje në Tiranë dhe në gjithë Shqipërinë. Kjo nuk do as mend, as kalem. As dekret, as sekret. Nuk do as sherr, as shamata. Në datën 30 qershor, ne do të vendosim se si Baldushku, Petrela, Farka, Krraba, Bërzhita, Kashari, Ndroqi, Peza, Shën Gjergji, Zallbastari, Zall Herri do të shkojnë drejt fitores për Tiranën që duam. Pala tjetër është në pikë të hallit. Këtu ka qenë Baldushku gjithmonë, s’ka ardhur ndonjëherë as Luli, as Saliu, as Iliri, se nuk duan t’ia dinë për njerëzit. Thonë të vijnë njerëzit tek ne në Bulevard dhe njëri nga njëra anë e bulevardit në protestë, tjetri nga një anë e bulevardit, duke çuar letra për zgjedhje, si ajo kënga që këndohej atëherë: Letër më ke çuar atje në ushtri, s’më paske harruar që kur ishim fëmijë”, tha Veliaj.

Më tej, ai shtoi se shfuqizimi i dekretit të zgjedhjeve nga ana e Presidentit të Republikës është një akt i pavlefshëm juridik, ndaj, theksoi Veliaj, në 3 qershor qytetarët dhe ata të gjithë Shqipërisë do të votojnë për të zgjedhur drejtuesit e rinjë të bashkive dhe për të vijuar rrugën e nisur të zhvillimit. 

 “Nëse këta do e mbajnë njëri-tjetrin me gajret dhe serume dhe do çojnë letra nul që s’kanë pikë vlere juridike, do çojnë letra nul që s’kanë pikë vlere morale, letra nul si letra vetëvrasje politike, këta le t’ia çojnë njeri-tjetrit, por nuk jemi këtu për hallet e tyre, ne jemi këtu për hallet tona, për t’i zgjidhur dhe për të punuar për familjet tona dhe fëmijët tanë. Në datën 30 qershor, ata mund të çojnë letra, serume, llokume, njeri tjetrit sa të duan, por në datë 30 qershor, çdo njeri në Tiranë e Shqipëri do zgjohet në mëngjes dhe do i bëjë një pyetje vetes: Do votoj ose do merrem me pazarin që këta duan për 30 vitet që ikën apo do punoj për marrëveshjen që unë dua për 30 vitet që do vijnë?! Kjo është pyetja”, tha Veliaj.

Anulimi i datës së zgjedhjeve nga Presidenti Meta nuk i ka ndalur përfaqësuesit e mazhorancës në fushatën elektorale, ku pavarësisht se është ditë e diel, kandidatët kanë lajmëruar që në mëngjes se sot do të vijojnë takimet elektorale siç ishin planifikuar, duke i qëndruar deklaratës së Ramës, i cili iu përgjigj Metës nga Berati, kur tha se zgjedhjet do të bëhen me 30 qershor.

I pari që ka bërë njoftim nëpërmjet rrjeteve sociale ka qenë zëvendëskryeministri Erion Braçe, i cili ka postuar foto me shtabin elektoral në Divjakë, që po punojnë për zgjedhjet.

Më pas, kryebashkiaku i Tiranës ka postuar një foto me disa fëmijë, ku shkruan se “bëhet fjalë për brezin e së ardhmes, jo për zgjedhjes e radhës”. Madje, ai ka planifikuar të dielën takime elektorale në Baldushk.

Po ashtu edhe kryeministri Rama pritet që të jetë të dielën paradite në Burrel dhe pasdite në Dibër për të prezantuar kandidatët për kryetar bashkie në këto dy qytetet, megjithëse ende nuk ka pasur një njoftim zyrtar nga zyra e kryeministrisë.