Socialistët po sjellin mënyra të reja për të zhvilluar fushatën elektorale, larg mitingjeve në salla të mbyllura apo mbledhjeve të stërzgjatura.
Tani Rama e Veliaj zgjedhin t’i takojnë votuesit nëpër kafe apo edhe në trotuar si në rastin konkret.
Fotot janë shkrepur mëngjesin e së premtes, ku Rama, Veliaj dhe Gjylamenti shihen duke ecur në trotuarin tek zona e Shallvareve dhe ku më pas janë ulur në një kafe aty pranë.
Ministria e Arsimit ka vendosur të mbyllë përfundimisht veprimtarinë e tre shkollave private, dy në Tiranë dhe një në Kavajë, ndërkohë që për vitin e ri shkollor ka hapur një kopësht në Dropull.
Burimet zyrtare nga Ministria e Arsimit dhe Sportit bënë me dije se është vendosur mbyllja e dy gjimnazeve, konkretisht gjimnazit “Eurolingua” dhe “Univers Netëork”, të dy me adresë në Tiranë.
Po ashtu është vendosur shkolla mbyllja e shkollës private 9-vjeçare “Visare”, e cila i përket një shoqate me po të njëjtin emër në Kavajë.
Sipas urdhrave përkatës të MAS, të tria këto institucione arsimore private do i “vënë kyçin” shkollave në përfundim të këtij viti shkollor.
Ndërkohë, Ministria e Arsimit ka vendosur që të hapë një kopsht të ri publik në fsahatin Bularat, Bashkia Dropull. Hapja e këtij kopshti ishte propozuar nga Këshilli Bashkiak Dropull që në muajin prill të këtij viti dhe tashmë do të jetë i disponueshëm nga shtatori i këtij viti.
Kryeministri Rama e ka nisur mëngjesin e kësaj të premte duke pirë një kafe me banorët e njësisë 10 në Tiranë.
Në krah të tij ndodhet kryebashkiaku i Tiranës, Erion Veliaj i cili kandidon për një mandat të dytë për bashkinë e kryeqytetit.
Por fushatës i është bashkuar sot edhe ish ministri i Brendshëm, Fatmir Xhafaj. Ai tha se në këtë zonë janë 24 mijë votues, por një pjesë e tyre jetojnë në periferi pasi kanë dhënë banesat e tyre me qira për lokale dhe zyra.
Ndërsa Veliaj tha se në Tiranë aktualisht janë ndërtuar 7 parkime nëntokësore duke i ardhur në ndihmë qytetarëve.
Merkel thuhet ka refuzuar kërkesën e Komisionit Europian për hapje të shpejtë të negociatave me Shqipërinë dhe Maqedoninë e Veriut.
DW raporton se sipas gazetës së njohur gjermane, Süddeutsche Zeitung” të premten (07.06) kancelarja gjermane, Angela Merkel i ka bërë një refuzim të qartë kërkesës së Komisionit Europian për hapje të shpejtë të negociatave të anëtarësimit me Shqipërinë dhe Maqedoninë e Veriut. Këtë ajo e ka thënë në një seancë të komisionit parlamentar të Bundestagut për Europën, sipas informacioneve të “Süddeutsche Zeitung”. Merkel ka bërë të qartë, se një vendim për këtë pritet më së hershmi në tetor.
Me këtë kancelarja del qartazi kundër partnerit në koalicion, Partisë Socialdemokrate, SPD, që përkrah votimin pro për hapjen e negociatave në Këshillin e BE më 18 qershor. Ministri gjerman i Shtetit për Europën në Ministrinë e Jashtme, Michael Roth (SPD) është një nga politikanët gjermanë që është angazhuar fort javët e fundit për hapjen e negociatave me dy vendet e Ballkanit. Ai ka theksuar në intervista të ndryshme, se angazhimi i Shqipërisë për reforma duhet të vlerësohet.
CDU/CSU dhe SPD me qëndrime të ndryshme
Mospërputhja e qëndrimeve brenda koalicionit qeverisës gjerman u vu re hapur pas publikimit të progres-raportit të Komisionit Europian në fund të majit. KE kërkoi hapjen e shpejtë të negociatave si me Shqipërinë ashtu edhe Maqedoninë e Veriut. Por CDU/CSU është e rezervuar edhe këtë vit, ajo ka nevojë për analizë të kujdesshme raportit. Deputeti gjerman i CDU, dhe kryesues i grupit parlamentar për Ballkanin Perëndimor në Bundestag, Johann Wadepuhl, ka thënë se CDU/CSU do duhet të shqyrtojë me kujdes raportet e progresit mbi Shqipërinë dhe Maqedoninë e Veriut.
“Vetëm në këtë mënyrë mund të marrim një vendim të përgjegjshëm nëse janë plotësuar me të vërtetë kushtet e fillimit të negociatave për anëtarësim të këtyre dy vendeve në BE”, ka thënë Wadephul në një deklaratë të publikuar menjëherë pas publikimit të progres-raportit të KE në fund të majit. Për Wadephul, Shqipëria nuk ka plotësuar asnjë nga kushtet e caktuara në Këshillin e Ministrave të Jashtëm, të datës 28 qershor 2018.
Për shkak të kalendarit të punës të CDU/CSU nuk besohet, se kjo temë do të shqyrtohet para vjeshtës.
Presidenti rus, Vladimir Putin është lënë jashtë ceremonive përkujtimore të zhvilluara në Britani dhe në Francë me rastin e D-Day, por vetë Putin është shprehur: “s’ka problem se s’kishte ftesë, pasi kishte shumë punë të tjera për të bërë”.
Presidenti rus ishte i ftuar në ceremonitë që u zhvilluan me rastin e 70 vjetorin, në vitin 2014, por u la jashtë këtyre ceremonive të zhvilluara me rastin e 75 vjetorit të zbarkimeve të aleatëve në Normandi gjatë Luftës së Dytë Botërore.
Duke folur në një forum ekonomik në Shën Petersburg, ai tha se mungesa e një ftese nuk përbënte një çështje.
“Ne gjithashtu nuk ftojmë të gjithë në çdo ngjarje. Përse duhet të ftohem kudo, unë kam punë të mjaftueshme këtu”, tha ai.
Vërejtjet e tij erdhën një ditë pasi Ministria e Punëve të Jashtme të Rusisë këmbënguli se rëndësia e D-Day në rezultatin e luftës nuk duhet të tejkalohet.
Shtete perëndimore ndajnë qëndrime të ndryshme me Rusinë përsa i përket rëndësisë së D-Day. Ndërsa Britania dhe Franca e cilësojnë të përcaktues për fitoren e Luftës zbarkimin e aleatëve në Normandi, ndryshe mendon Rusia.
Rusët mendojnë se lufta e ushtarëve sovietikë kundër nazistëve dhe qëndresa e tyre e gjatë është më determinuese në fitoren e Luftës.
Moska kishte luftuar forcat gjermane në lindje për pothuajse tre vjet deri në kohën e operacioneve të D-Day që përfundimisht çuan në çlirimin e Evropës Perëndimore nga Gjermania naziste.
Bashkimi Sovjetik humbi më shumë se 25 milionë jetë në atë që quhej Lufta e Madhe Patriotike – më shumë se çdo komb tjetër. Rusia zhvillon një paradë masive ushtarake çdo vit për të përkujtuar përvjetorin e fundit të Luftës së Dytë Botërore dhe për të kujtuar rolin e trupave sovjetike.
Policia e Shtetit në bashkëpunim me ministrinë e Arsimit ka vënë në dispozicion 560 efektivë policisë për të mbikëqyrur mbarëvajtjen e provimit të Maturës Shtetërore.
Policia njofton se të enjten “në zbatim të telegramit të Drejtorit të Departamentit për Sigurinë Publike “Për marrjen e masave për shoqërimin e automjeteve të Postës Shqiptare me materialet e provimit të Maturës Shtetërore të datës 07.06.2019, u bë shoqërimi i materialeve të provimit në 10 linja apo destinacione të ndryshme në të gjithë vendin, ku nga Policia e Shtetit kishte angazhuar rreth 20 punonjës police dhe 10 automjete të policisë.
Gjatë natës deri sot (te premten) në orën 08:00 ambientet e DAR/ZA në rrethe u siguruan nga Policia e Shtetit, ku u angazhuan 40 punonjës policie.
Në rreth 206 shkolla në të gjithe vendin do të zhvillohet provimi i parë i Maturës Shtetërore 2019.
Për sigurimin e mbarëvajtjes së provimeve, Policia e Shtetit ka planifikuar me shërbim rreth 560 punonjës police dhe 45 automjete policie”, njofton Policia e Shtetit.
Shërbimet policore janë vendosur në të gjitha strukturat vendore dhe kanë marrë të gjitha masat e nevojshme për të monitoruar gjithë procesin e provimit në të gjitha shkollat ku do të zhvillohet provimi.
Pas përfundimit të provimit përsëri punonjësit e Policisë do të kryejnë shoqërimin e materialeve të provimit në destincaionin përkatës.
Ka nisur mëngjesin e së premtes testimi i parë i Maturës Shtetërore.
Nxënësit e viteve të treta të gjimnazeve dhe shkollave të mesme profesionale janë paraqitur në orën 08:00 në shkollat përkatëse me një mjet identifikimi me vete. Janë rreth 36,134maturantë që sot do të japin provimin e gjuhës së huaj.
Provimi do të nisë në orën 10:00 dhe do të zgjasë dy orë e gjysmë.
5 ditë më vonë maturantët do të bëjnë testin e gjuhës shqipe e letërsisë dhe më 17 qershor do të jetë testi i radhës.
Më 24 qershor, provimet e maturës shtetërore përfundojmë me lëndën me zgjedhje, që ndryshe nga matura e shkuar këtë vit do të jetë vetëm 1 dhe jo 2.
Mediat televizive raportojnë se janë djegur gjatë natës dy makina të kryetares së PD-së në Ulëz e cila është edhe administratore e njësisë për bashkinë Mat.
Makinat e Gjelina Kalthit janë djegur nga zjarri, ndërkohë që ishin të parkuara pranë banesës së saj.
Ndërkohë ende nuk dihen shkaqet e djegies por policia ka shkuar në vendngjarje dhe po heton incidentin.
Radio Televizioni i Kosovës ka raportuar të premten se xhandarmëria serbe është futur rreth 8 km brenda territorit të Kosovës.
Ngjarja mësohet të ketë ndodhur në datën 31 maj, kur një ekip prej 4 pjesëtarësh të forcave kufitare të xhandarmërisë serbe janë futur në fshatrat e thella të malësisë së Kamenicës.
Po sipas RTK-së, ngjarja ka ndodhur në fshatin Svircë e Kamenicës.
“Xhandarët serbë kanë lëvizur nëpër territorin e Kosovës më shumë se tetë kilometra, derisa kjo rrugë gjendet rreth dy kilometra vijë ajrore brenda territorit të Kosovës.
Gjatë lëvizjes së tyre nëpër territorin e Kosovës, nuk ka pasur ndonjë ekces ose ndonjë ndalesë të qytetarëve të cilët posedojnë ferma në atë rajon ose merren me prerje të pyjeve, por banorët janë shqetësuar nga veprimi i xhandarmërisë serbe.
Ky është një provokim i radhës i shtetit serb ndaj shtetit të Kosovës, pasi që kjo nuk është hera e parë që ndodh një gjë e tillë”, shkruan media publike RTK.
