Osmani takon Zv. Ndihmës Sekretarin e Shtetit të SHBA-ve: Diskutuam për zhvillimet e fundit në vend dhe për dialogun me Serbinë

Presidentja Vjosa Osmani ka takuar këtë të shtunë Zëvendës Ndihmës Sekretarin e Shtetit të SHBA-ve, Alexander Kasanof në Pragë. Lajmin e ka bërë të ditur vetë ajo, duke ndarë në rrjetet sociale disa foto nga ky takim.

Osmani ka zbuluar se me Kasnof kanë diskutuar për zhvillimet e fundit në vend si për dialogun me Serbinë.

“Kënaqësi të takoj në Pragë Zëvendës Ndihmës Sekretarin e Shtetit të SHBA-ve, Alexander Kasanof. Diskutim përmbajtësor mbi zhvillimet e fundit, rëndësinë vendimtare të angazhimit proaktiv e të shtuar të Shteteve të Bashkuara për paqe të qëndrueshme në rajon, si dhe mbi dialogun Kosovë-Serbi”, ka shkruar ajo në “Facebook”./abcnews.al

Ministri Vengu viziton Komandën e KFOR dhe kontingjentin e forcave shqiptare në Pejë

Gjatë vizitës zyrtare në Kosovë, ministri i Mbrojtjes Pirro Vengu u ndal edhe në Komandën Qendrore të KFOR si dhe në Komandën e Zonës Perëndimore në Pejë, ku takoi trupat shqiptare, që shërbejnë përkrah vendeve aleate dhe partnere të NATO-s.

I shoqëruar nga ambasadori i Republikës së Shqipërisë në Kosovë Petrit Malaj, ministri i Mbrojtjes u prit nga komandanti i KFOR gjeneralmajor Özkan Ulutaş me të cilin ndanë shqetësimin rreth kontekstit të brishtë të sigurisë, kryesisht në veri të Kosovës, duke kujtuar sulmet kriminale dhe terroriste ndaj trupave të KFOR si edhe atë në Banjskë, vitin e kaluar:

“Shqipëria mbështet pa asnjë lëkundje KFOR-in si të vetmen garanci për një mjedis të sigurt dhe të qëndrueshëm në Kosovë”, u shpreh Vengu, duke falënderuar gjeneralmajor Ulutaş për vendosmërinë dhe maturinë në parandalimun e situatave kërcënuese.

Në bazën e KFOR në Pejë, delegacioni shqiptar u prit nga komandanti italian i bazës, koloneli Mundo, i cili e informoi zotin Vengu për kontributin e trupave shqiptare, duke theksuar se angazhimi dhe profesionalizmi i tyre vlerësohet nga të gjithë shtetasit e Kosovës dhe veçanërisht nga minoritetet.

Në takimin me kontingjentin shqiptar, ministri Vengu falënderoi gratë dhe burrat e Forcave tona të Armatosura që shërbejnë në misionin e KFOR, i cili ka për qëllim sigurinë e të gjithë popullsisë dhe lirinë e lëvizjes në të gjithë territorin e Republikës së Kosovës.

Rritja e kontributeve të Shqipërisë në misionet e NATO, kërkon gjithashtu një vëmendje më të madhe ndaj përmirësimit të kushteve në mision të forcave tona dhe mbështetje të vazhdueshme për familjet e tyre.

Kontingjenti shqiptar në misionin e KFOR është rritur së fundmi dhe përbëhet nga 107 efektivë ne Komandën Rajonale Perëndimore në Pejë dhe 25 përfaqësues civilë dhe ushtarakë në Shtabin e KFOR në Film City, Prishtinë.

Shqipja rrezikon të mos jetë më gjuhë e dytë zyrtare në Maqedoninë e Veriut? Gjykata Kushtetuese do të vendosë në shtator

Gjykata Kushtetuese në Maqedoni do të vendosë në shtator nëse do ta lërë në fuqi apo do ta shfuqizojë Ligjin për Gjuhën. Nëse do të ndodhë kjo e dyta, gjuha shqipe nuk do të jetë gjuhë e dytë zyrtare në Shkup.

Kryetari i Gjykatës Kushtetuese Darko Kostadinovski ka paralajmëruar iniciimin e një nisme kundër gjuhës shqipe. Ai tha se “me ligjin për përdorimin e gjuhëve, politika ka krijuar një kaos juridik e që rezultoi me kaos politik”.

“Me ligjin për përdorimin e gjuhëve, politika ka krijuar një kaos juridik e që rezultoi me kaos politik, mosbesim dhe dilemma”, tha Kostadinovski.

Në pritjet nëse Kushtetuesja do të shfuqizojë apo do ta lë në zbatim ligjin për gjuhët, Kostadinovski thotë se gjykata do të sjellë vendim të argumentuar dhe me bazë juridiko-kushtetuese.

“Ajo që është e rëndësishme, është të shihen argumentet objektive në vendimin cilido që të jetë, para se të jepet çfarëdo komenti. Vendimi i Gjykatës duhet të respektohet dhe pranohet si shprehje e pjekurisë të politikës dhe shoqërisë, vendimi të jetë kornizë orientuese për veprim të ligjvënësit”, shtoi ai.

Kostadinovski thekson se zbatimi i ligjit për gjuhët po krijon probleme, duke mos cekur se çfarë probleme, por duke aluduar në vërejtjet që dolën nga komisioni i Venecias. E për të mos ndodhur kjo, nga 1 shtatori hyn në fuqi akti i ri i gjykatës, i cili parasheh afat kohor prej gjashtë muajsh për Qeverinë, që të përmirësojë ligjin për gjuhët, respektivisht për të larguar vërejtjet dhe dilemat e konstatuara.

Pas deklaratës së kreut të Gjykatës Kushtetuese, Kostadinovski, kanë ardhur edhe reagimet e faktorit politik shqiptar.

Koalicioni VLEN, partitë shqiptare në bashkëqeverisje me VMRO e kanë konsideruar nismën për kontestimin e dygjuhësisë si tentativë për grusht shteti. Një reagim i fortë ka ardhur edhe nga Fronti Europian, koalicioni i partive shqiptare opozitare i përbërë nga BDI dhe Aleanca për Shqiptarët të cilët bëjnë thirrje të mos preket gjuha shqipe.

Nga ana tjetër, Agjencia Për zbatimin e Ligjit për Gjuhët e pakicave ka deklaruar se “nismat e këtilla janë kryekëput me karakter politik, nacionalist dhe antinjerëzor”.

“Gjuha shqipe u përket shqiptarëve dhe nuk rrezikon askënd. Tendenca për ta përjashtuar shqipen nga përdorimi zyrtar, është ide e vjetër e cila, siç e dimë, ka prodhuar tensione dhe konflikte”.

Aksident në Devoll/ Motomjeti përplaset me automjetin, dëmtohen dy drejtuesit

Një aksident ka ndodhur këtë të premte në Devoll. Mësohet se një motomjet është përplasur me një automjet.

Si pasojë, janë dëmtuar të dy drejtuesit e mjeteve, të cilën janë jashtë rrezikut për jetën.

Njoftimi i Policisë:

Rreth orës 18:50, në fshatin Barçanj, Devoll, motomjeti me drejtues shtetasin 30 vjeç, është përplasur me automjetin tip “Toyota”, me drejtues shtetasin 72 vjeç.

Si pasojë janë dëmtuar të dy drejtuesit e mjeteve, të cilët ndodhen për mjekim në spital, jashtë rrezikut për jetën.

Grupi hetimor po punon për sqarimin e rrethanave të aksidentit./abcnews.al

Shefi i mbrojtjes amerikane pret në Pentagon Ministrin e Mbrojtjes të Ukrainës

Ministri i Mbrojtjes i Ukrainës, Rustem Umerov, vizitoi Pentagonin të premten për të informuar Sekretarin amerikan të Mbrojtjes lidhur me depërtimin e forcave ukrainase përtej kufirit rus. Siç njofton korrespondentja e Zërit të Amerikës, Carla Babb nga Pentagoni, dy udhëheqësit u përqendruan gjithashtu tek nevojat ushtarake të Ukrainës përpara një takimi tjetër të Grupit të Kontaktit të Mbrojtjes për Ukrainën, i caktuar të mbahet javën e ardhshme.

Shefi i ushtrisë ukrainase, Rustem Umerov dhe Sekretari amerikan i Mbrojtjes, Lloyd Austin, folën për shtimin e sulmeve ajrore ruse kohët e fundit ndaj Ukrainës si dhe vazhdimin e inkursionit ukrainas në territorin rus të Kurskut. Zëri i Amerikës e pyeti zëdhënësin e Pentagonit nëse Ukraina ka ende kufizime për përdorimin e armëve amerikane.

“Ukrainasit mund t’i përdorin armët amerikane për t’u mbrojtur nga sulmet ndërkufitare, por sa i përket sulmeve me rreze të gjatë në thellësi të Rusisë, politika jonë nuk ka ndryshuar”, tha zëdhënës i Pentagonit, Gjenerali Pat Ryder.

Zyrtarët kanë ngritur shqetësime se sulmet brenda Rusisë mund ta provokojnë Moskën që të përdorë armët bërthamore.

“Perëndimi beson se Rusia nuk do t’i përdorë kurrë armët bërthamore. Kemi një doktrinë bërthamore e cila thotë se nëse veprimet e dikujt kërcënojnë sovranitetin dhe integritetin tonë territorial, ne e konsiderojmë të mundshme përdorimin e të gjitha mjeteve që kemi në dispozicioni”, tha Presidenti Vladimir Putin.

“Nëse ata kanë pushtuar një pjesë të Rusisë dhe Moska nuk ka përdorur ende armë bërthamore, atëherë Rusia nuk do ta bëjë këtë. Kjo frikë nga përshkallëzimi po na paralizon dhe duhet të ndalet”, thotë Adam Kinzinger, ish ligjvënës republikan.

Ish ligjvënësi republikan, Adam Kinzinger, ka bërë thirrje për mbështetje shtesë për Ukrainën. Ai i tha Zërit të Amerikës se operacioni i Ukrainës në Kursk ka qenë i suksesshëm.

“Ukraina ka marrë po aq ose më shumë territor rus sesa rusët morën territor ukrainas vitin e kaluar. Rusia ka humbur më shumë ushtarë sesa Shtetet e Bashkuara gjatë Luftës së Dytë Botërore dhe nuk kanë arritur asgjë”, thotë zoti Kinzinger.

Pentagoni thotë se Rusia ka tërhequr një numër të vogël forcash nga Ukraina për të mbrojtur Kurskun. Por ekspertët thonë se prova e vërtetë do të jetë nëse Ukraina mund ta tjetërsojë operacionin në një avantazh afatgjatë.

“Kjo është një recetë për sukses, nëse arrihet, do të jetë një operacion shumë i mirë. Është shumë herët për të gjykuar për momentin”, thotë koloneli në pension, Alexander Vindman, i cili ka punuar për Këshillin e Sigurisë Kombëtare të Shteteve të Bashkuara.

Operacioni nuk i ka ndalur sulmet e Rusisë. Zyrtarët ukrainas thanë të premten se një sulm gjatë natës në një fabrikë në qytetin verior të Ukrainës, Sumy, vrau dy gra dhe plagosi 11 individë./voa

Detaje të reja/ Armando Duka u kërcënua nga presidenti i Klubit Iliria dhe të afërm të tij, zbulohet shkaku

Detaje të reja kanë dalë nga arrestimi i pesë personave në Durrës, Redian Loci, Petrit Selmani, Brajan Selmani, Santiago Selmani dhe Nazmi Selmani, ndërsa dy të tjerë po procedohen penalisht.

Mësohet se ata kanë kërcënuar me mesazhe për shkak të detyrës, presidentin e Federatës Shqiptare të Futbollit, Armando Dukën. Sakaq, raportohet se është kërcënuar nga presidenti i Klubit Iliria Nazmi Selmani dhe të tjerët janë të afërm të tij.

FOTO/ Detaje të reja nga ngjarja në Korçë, 31-vjeçarja po kthehej nga puna kur ish-burri i hodhi benzinën

Detaje të reja kanë dal nga ngjarja e rëndë që ndodhi këtë të shtunë në Korçë.

Mësohet se 31 vjecarja ka qene duke u kthyer nga puna ne shtëpi, rreth ores 17:00. Ish-bashkeshorti e ka ndaluar pak meter larg shtëpise duke i hedhur ne trup nje shishe me benzine dhe me pas i ka vene flaken.

Tashmë gjendja e Melisa Trendafilit është rënduar dhe ajo është dërguar drejt Repartit te Djegies ne QSUT.

Çifti ishin në proces divorci dhe e reja gjatë kësaj periudhe jetonte me te emen dhe dy femijet e mitur, 3 dhe 5 vjec.

Shansi i fundit për Manajn, skuadra e Trabzonspor gati sulmin përfundimtar për sulmuesin

Kjo situatë e paqartë do të përfundojë në pak ditë. Rey Manaj ende ka shumë shpresë të shkojë te Trabzonspor, një emër i rëndësishëm i elitës së futbollit turk, i cili po bën gati sulmin e fundit për ta marrë “yllin” e Kombëtares shqiptare.

Skuadra e shquar turke ka gati një muaj që nuk ka shënuar gol, dhe zgjidhja e vetme e këtij problemi është që të forcojë sulmin, me Manajn, që është një nga emrat më të pëlqyer për drejtuesit, ndonëse ai nuk është i vetmi, pasi në listë janë edhe sulmues të tjerë si holandezi Wout Weghorst dhe “shtatlarti” nigerian, Paul Onuachu i Southampton.

Skuadrës së Trabzonspor i duhet të paktën edhe një sulmues dhe interesi për Manajn ka qenë që më parë, madje ka pasur bisedime mes palëve dhe me merkaton e transferimeve shumë pranë mbylljes për këtë stinë vere klubi turk duhet të veprojë shpejt.

Sulmuesi i kombëtares shqiptare ka dy avantazhe ndaj rivalëve, Ai është më i ri në moshë, 27 vjeç, dhe kartoni i tij kushton më lirë, rreth 5 milionë euro, ndërsa Onuachu arrin në 13 milionë, po ashtu, Manaj ka përvojë në Superligën turke, diçka që nuk e ka holandezi Weghorst, ndërsa nigeriani ishte vjet i huazuar te Trabzonspor duke shënuar 15 gola.

Megjithatë golat e “shtatlartit” të sulmit, nuk krahasohen me “bomberin” tonë, i cili sezonin e kaluar dërgoi topin plot 18 herë në rrjetë, duke u parakaluar vetëm nga “yje” të këtij sporti, si Edin Dzeko e Mauro Icardi. /i.m /abcnews.al

Zëvendëskomandanti i KFOR-it takohet me kryetarin e Listës Serbe, në qendër të diskutimeve Veriu i Kosovës

Zëvendëskomandanti i misionit të KFOR-it të udhëhequr nga NATO, gjeneral brigade Federico Bernacca, ka pritur këtë të shtunë një delegacion të partisë politike Lista Srpska, në selinë e KFOR-it në Camp Film City në Prishtinë. Delegacioni drejtohej nga Zlatan Elek, kryetar i Listës Serbe.

Sipas njoftimit, ata ndanë pikëpamjet mbi zhvillimet e fundit të sigurisë, duke përfshirë veriun e Kosovës.

“Ata ndanë pikëpamjet mbi zhvillimet e fundit të sigurisë, duke përfshirë veriun e Kosovës. Gjenerali Bernacca dëgjoi shqetësimet e shprehura nga delegacioni vizitues. Ai theksoi se KFOR-i ka një prani të dukshme dhe fleksibël në mbarë Kosovën dhe është i përgatitur mirë për të adresuar çdo zhvillim të rëndësishëm të sigurisë. Ai përsëriti përkushtimin e palëkundur të misionit për të kontribuar në sigurinë dhe stabilitetin për të gjithë njerëzit që jetojnë në Kosovë, në çdo kohë dhe në mënyrë të paanshme, në përputhje me mandatin e tij të gjatë të OKB-së. Në këtë drejtim, KFOR-i vazhdon të mbështesë plotësisht dialogun e ndërmjetësuar nga BE-ja ndërmjet Beogradit dhe Prishtinës”, thuhet në njoftim./abcnews.al

EMRAT/ Ish-bashkëshorti lyen me benzinë 31-vjeçaren dhe i vendos flakën në Korçë

Korçë/ Bashkëshorti lyen me benzinë ish bashkëshorten e tij dhe i vendos flakën. Mësohet nga burime paraprake, se çifti janë në proces divorci.

Bledar Trëndafili (bashkëshorti) ka shkuar pranë banesës me qira që jetonte ish gruaja e tij Melisa Trëndafili dhe ka kryer aktin e rëndë.

Gruaja 31 vjeçare është dërguar në spitalin e qytetit për të marrë ndihmën mjekësore nga mjekët, ndërsa policia është në kërkim të autorit pasi ai është larguar nga banesa.