Zbardhet ngjarja e ndodhur dy ditë më parë në Shkodër, ku një agjencie funerali iu vu tritol. Policia ka identifikuar dhe shpallur në kërkim një 35-vjeçar, i cili është kapur mat nga kamerat e sigurisë.
NJOFTIMI I POLICISE Zbardhet ngjarja e ndodhur në lagjen “Skenderbeg” në oret e para të mëngjesit të datës 29.08.2024. Si rezultat i veprimeve intensive hetimore, identifikohet dhe shpallet në kërkim 35-vjeçari që dyshohet se hodhi lëndë plasëse, në derën e një agjencie funerale, ditën e djeshme.35-vjeçari, me precedent penal për armëmbajtje pa leje. Specialistët për Hetimin e Krimeve të Komisariatit të Policisë Shkodër, si rezultat i veprimeve hetimore intensive të kryera për zbardhjen e ngjarjes së ndodhur mëngjesin e ditës së djeshme, në lagjen “Skenderbeg”, ku u hodh një sasi lënde plasëse në derën e agjencie funerale, kanë identifikuar dhe shpallur në kërkim autorin e dyshuar të këtij rasti, shtetasin B. P., 35 vjeç.Nga veprimet hetimore dyshohet se për shkak të një borxhi të pashlyer, ky shtetas ka hedhur në derën e agjencisë funerale në pronësi të bashkëshortëve F. F. dhe A. F., një sasi lënde plasëse, nga shpërthimi i së cilës u shkaktuan vetëm dëme materiale.
Një ngjarje e rëndë ka ndodhur në Tiranë, ku një 56-vjeçari ka humbur jetën në mënyrë tragjike duke riparuar makinën.
Sipas policisë, ngjarja u regjistrua në orët e para të mëngjesit, në rrugën “Siri Kodra”, ku 56-vjeçari dyshohet se duke riparuar tamburet e makinës me gurë fresibël, aksidentalisht ka prerë kokën dhe për pasojë ka humbur jetën.
Më datë 31.08.2024, rreth orës 07:40, në rrugën “Siri Kodra”, shtetasi A. M., 56 vjeç, dyshohet se duke riparuar tamburet e makinës me gurë fresibël, aksidentalisht është dëmtuar (prerë) në kokë, dhe si pasojë ka gjetur vdekjen e menjëhershme.
Grupi hetimor po punon për sqarimin e rrethanave të ngjarjes.
Vrasësit largohen si gjithnjë të qetë, ndërsa viktima, Elis Rroshkodoli mbi të cilin u qëllua me armë me silenciator, sipas policisë ka kryer krime jashtë vendi. Një person i ulur në tavolinë me të është dëshmitari okular, ndërsa atentatorët kanë lëvizur me një mjet me targa malazeze.
Nuk dihet itinerari, për shkak se mjeti, në fakt, nuk ka pasur targë të ngjitur, por e ka pasur brenda makinës, çka mund të jetë lëvizur menjëherë nga personat brenda mjetit.
Policia tha se viktima është një 36 vjeçar, me rekorde të shumta kriminale jashtë vendi, kryesisht në Belgjikë, por pa përmendur nëse i riu, i rritur jetim, të kishte probleme me drejtësinë apo me ndonjë grup kriminal në qytetin e Shkodrës. Hetimet janë përqendruar në pistën e hakmarrjes, ndërkohë që dyshimet e para sipas të dhënave që janë mbledhur në vendin e ngjarjes tregojnë se viktima të kishte qenë pjesë e grupit të Bajrajve!
VRASJA
Elis Rroshkodoli, 36 vjeç, u vra me armë zjarri ulur në një lokal në lagjen “Ahmet Haxhia” në Shkodër mesditën e kësaj të premte, konkretisht në orën 12.30! I riu ishte i shoqëruar nga një tjetër person në tavolinë, në momentin që pranë tyre u afrua një burrë i maskuar, i cili në drejtim të tij derdhi breshëri prej rreth 18 plumbash, duke e lënë të vdekur në vend.
Autori, identiteti i të cilit akoma nuk është zbuluar nga Policia e Shkodrës, është larguar me një automjet nga vendi i ngjarjes, për të cilin po punohet për të gjurmuar lëvizjet. Nuk përjashtohet mundësia që pjesë e atentatit të jenë edhe persona të tjerë. Blutë po punojnë për vëzhgimin e kamerave të sigurisë për të zbardhur detaje mbi ngjarjen e rëndë, pjesë u bënë edhe 2 grupe të Forcës Kombëtare të Sigurisë në ndjekje të autorit.
Ekspertët kriminalistë mblodhën çdo provë të mundshme brenda perimetrit të sigurisë, i cili mund të ndihmojë në identifikimin e agresorit. Rroshkodoli, me sa duket, i druhej një atentati të mundshëm, pasi në çantën e tij të dorës iu gjet një pistoletë me fishek në gojë, gati për qitje.
Viktima 36 vjeç nuk është emër i panjohur për blutë në Shkodër, ndërsa njihej si person tejet problematik brenda dhe jashtë vendit. Në vitin 2023, Elis Rroshkodoli plagosi me thikë një të ri rumun, periudhë në të cilën u arratis drejt Stambollit. Shqiptari u shpall në kërkim nga autoritetet rumune për plagosjen, sherri për të cilën nisi në një qebaptore mes Rroshkodolit dhe pronarit të një klubi nate.
36-vjeçari u ngrit nga tavolina dhe me një thikë qëlluar pronarin e lokalit. Në 2014-ën rezulton të jetë arrestuar bashkë me një grup shqiptarësh të tjerë për grabitje në Belgjikë. Policia tha se të atin, Kujtim Rroshkodoli, ia kanë vrarë në 1997-ën dhe më shumë se 10 vjet me parë viktima dyshohet se ka qenë autor edhe i plagosjes së 2 vëllezërve në Shkodër, por policia nuk bën me dije se kush janë të plagosurit.
POLICIA PËR NGJARJEN
Policia e Shkodrës, dje pak çaste pas ndodhjes së krimit bëri me dije zyrtarisht se: Rreth orës 12:30, në lagjen “Ahmet Haxhia”, në një lokal, dyshohet se një shtetas i paidentifikuar ka vrarë me armë zjarri shtetasin E. Rr., rreth 36 vjeç, banues në Shkodër. Me marrjen e njoftimit, kanë shkuar menjëherë në vendngjarje, shërbimet e Drejtorisë Vendore të Policisë Shkodër dhe drejtuesit e Drejtorisë dhe të Komisariatit të Policisë Shkodër. Në ndihmë të Policisë Vendore kanë shkuar dhe dy grupe të Forcës Kombëtare të Sigurisë, Njësia Shkodër dhe janë vënë në ndjekje të autorit.
Gjithashtu, është ngritur një grup hetimor i cili ndodhet në vendngjarje dhe po vijon punën intensive në bashkëpunim me Prokurorinë, për sigurimin e provave për dokumentimin ligjor të kësaj ngjarjeje. Nga veprimet paraprake në vendin e ngjarjes, grupi hetimor ka gjetur në çantën e dorës të 36-vjeçarit E. Rr., 1 armë zjarri pistoletë me fishekë në fole gati për qitje. Vijojnë veprimet dhe kontrollet intensive, për identifikimin dhe kapjen e autorit”
HETIMET DHE DYSHIMET
Janë një mori të dhënash që janë klasifikuar menjëherë në lidhje me aktivitetin e viktimës së atentatit të djeshëm në mes të qytetit të Shkodrës. Policia që me sa duket ka qenë në dijeni të aktivitetit të të riut jashtë vendit, ka përjashtuar të ishte ndonjë hasmëri e mbartur nga ky aktivitet kriminal.
Sipas të dhënave jo zyrtare mësohet se Rroshkodoli kishte kohë që përflitej si i pozicionuar në krahun e grupit të Bajrajve, të cilët u goditën nga operacioni i Prokurorisë së Posaçme, Metamorfoza, ku një pjesë u vunë në pranga dhe një pjesë e këtij grupi, që kanë dalë në bisedat e zbardhura të SKY ECC, u shpallën në kërkim.
Policia ka hapur kamerat e lokalit dhe ka kuptuar se vrasësi ka qenë një person me maskë fytyre, ndaj edhe ka qëlluar pa iu trembur identifikimit. Janë marrë në pyetje disa persona që kanë qenë të pranishëm në lokal, të tjerë që janë shoqëruar rastësisht, por deri orëve të vona policia nuk ka asnjë të dyshuar si të përfshirë në ekzekutim. Prej vitesh qyteti i Shkodrës dhe jo vetëm, por edhe rrethinat, janë kthyer në një sheshbetejë hakmarrjesh për larje hesapesh, ndërsa të përfshirë në ngjarjet e përgjakshme ka rezultuar të jetë edhe policia dhe prokuroria.
SPAK ka zbardhur me mijëra faqe biseda mes kapove të grupit të Bajrajve, ndërkohë në pranga dhe nën akuza të rënda bashkë me ta janë edhe biznesmenë, ish-shefa policie, prokurorë dhe dyshimet bien edhe mbi zyrtarë të tjerë që vijojnë ende të jenë në detyrë
Të paktën dy persona u vranë dhe 22 u plagosën kur një çati e kishës u shemb në qytetin brazilian të Recife, tha kryebashkiaku João Campos dhe autoritetet në shtetin verilindor të Pernambuco.
Çatia e kishës u shemb teksa po shpërndahej ushqim për nevojtarët dhe më shumë se 60 persona ndodheshin brenda kishës.Një burrë 54-vjeçar dhe një grua 68-vjeçare u gjetën të vdekur nga ekipet e shpëtimit që shkuan në vendin e ngjarjes.
Mes të plagosurve është një e grua e re shtatzënë, si dhe një fëmijë 4 vjeç. Sakaq, shkaku i shembjes po hetohet nga autoritetet. Panele fotovoltaike ishin instaluar në çatinë e kishës javën e kaluar, sipas një raporti nga faqja e lajmeve G1.
Gjykata e Lartë e Brazilit ka urdhëruar “pezullimin e menjëhershëm dhe të plotë” të “X”, dikur Twitter, në vend.
Në një deklaratë, gjykata tha se do të ndalojë platformën e mediave sociale derisa “X” të pajtohet me të gjitha urdhrat e gjykatës dhe të paguajë gjobat ekzistuese.
Gjyqtari Moraes, i cili ka qenë i përfshirë në një debat të gjatë me “X”, i kishte dhënë platformës së mediave sociale 24 orë për të emëruar një përfaqësues të ri ligjor ose do të përballej me pezullim, me një afat deri të enjten në mbrëmje.Platforma pritet të mos jetë e disponueshme në vend brenda 24 orëve të ardhshme, raporton BBC.
KOSOVË- Qeveria e Albin Kurtit vijon të ndërmarrë veprime të njëanshme duke sfiduar komunitetin ndërkombëtar.
Autoritetet e Kosovës njoftuan këtë të premte se kanë mbyllur 5 struktura paralele të Serbisë në Mitrovicën e Veriut, në Zveçan, në Zubin Potok dhe Leposaviç, komuna këto në Kosovë që kanë shumicë të popullsisë Serbe.
Menjëherë pak këtij veprimi të Qeverisë së Albin Kurt kanë reaguar të alarmuara Shtetet e Bashkuara të Amerikës. Ambasada Amerikane në Kosovës kritikoi qeverinë e Albin Kurtit se po përdor si instrument t Policinë e Vendit dhe po ndërmerr hapa të pakoordinuar me aleatët ndërkombëtar.
“Shtetet e Bashkuara dhe partnerët tanë ndërkombëtarë kanë kërkuar vazhdimisht nga Qeveria e Kosovës që të ketë prioritet koordinimin me bashkësinë ndërkombëtare dhe të mos ndërmarrë veprime të njëanshme për çështjet në agjendën e Dialogut të lehtësuar nga BE-ja. Dështimi i Qeverisë së Kosovës për t’iu përgjigjur këtyre kërkesave reflekton një përkeqësim real dhe në rritje të partneritetit tonë. Siç e kemi theksuar më parë, veprimet e pakoordinuara të Qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar. Ndërsa qeveria e Shteteve të Bashkuara është krenare që ka mbështetur themelimin dhe profesionalizmin e Policisë së Kosovës gjatë shumë viteve si pjesë e angazhimit tonë për të promovuar sigurinë dhe stabilitetin, përdorimi i Policisë vazhdimisht si Instrument I Qeverisë duke kryer veprime të pakoordinuara, nuk është në përputhje me premtimet e bëra nga Qeveria Kurti se “do të vazhdojë konsultimin dhe koordinimin me komunitetin ndërkombëtar”, thekson ambasada.
Në deklaratën e Ambasadës Amerikane thuhet se do të ketë ndryshime në bashkëpunimin e Shteteve të Bashkuara me Ministrinë e Punëve të Brendshme në Kosovë, një prove e qartë kjo nga Washingtoni se tani më Albin Kurti me veprimet e një anshme ka izoluar në mënyrë diplomatike Prishtinën zyrtare edhe nga fuqia ndërkombëtare që e krijoi atë si shtet.
Të paktën pesë persona kanë mbetur të plagosur me thikë në një autobus në Siegen të Gjermanisë. Mësohet se autore e dyshuar e krimit është një grua.
Autobusi ishte duke qarkulluar në drejtim të një festë në këtë qytet, kur një grua nxori thikën dhe filloi të sulmonte udhëtarët. Të pesë personat e plagosur janë transportuar në spital ku mjekët po luftojnë për jetën e të paktën tre prej tyre. Agresorja, 32-vjeçare është arrestuar nga policia, ndërsa deri më tani nuk mund të thuhet se bëhet fjalë për ndonjë sulm terrorist, ndërsa ende nuk dihet shkaku i sulmit.
Një vajzë 14-vjeçare ka vdekur pas një sulmi rus në qytetin lindor të Ukrainës, Kharkiv, në një shesh lojërash. Siç raporton BBC, të paktën pesë persona të tjerë u vranë dhe dhjetëra u plagosën kur sulmet goditën gjithashtu një bllok banesash pranë kufirit me Rusinë.
Pamjet nga vendi i ngjarjes treguan flakë dhe tym të zi të dendur që dilnin nga maja e ndërtesës ndërsa zjarrfikësit ndihmuan njerëzit të shpëtonin.
Presidenti ukrainas Volodymyr Zelensky përsëriti thirrjet e tij për aleatët ndërkombëtarë të Ukrainës që ta lejojnë atë të godasë objektivat brenda Rusisë për të parandaluar sulme të tilla. Sulmet erdhën vetëm disa orë përpara se Zelenskiy të largonte shefin e tij të forcave ajrore, gjenerallejtënant Mykola Olestyuk.
Kharkiv, qyteti i dytë më i madh i Ukrainës, është rreth 35 kilometra nga kufiri rus dhe ka qenë një objektiv i shpeshtë i sulmeve që nga fillimi i pushtimit të plotë të Rusisë në shkurt 2022. Guvernatori rajonal Oleg Sinegubov tha përmes Telegramit se të paktën 59 persona u plagosën, prej të cilëve 20 janë në gjendje të rëndë dhe disa kërkojnë amputim. Nëntë fëmijë u plagosën gjithashtu nga sulmet.
Këtë vit, Zvicra përjetoi gushtin e dytë më të nxehtë që nga fillimi i matjeve në vitin 1864. Temperatura mesatare deri tani ka qenë 17 gradë Celcius, 2.7 gradë mbi normën e periudhës 1991-2020.
Siç njoftoi të premten MeteoSwiss, një rekord i ri gushti ka të ngjarë të vendoset në Samedan, kantonin Graubünden, me një temperaturë mesatare prej 14.5 gradë. Kjo do të ishte 0.3 gradë më e lartë se vera e nxehtë e vitit 2003.
Një rekord i ri pritet gjithashtu në Jungfraujoch me një mesatare mujore prej 3.3 gradë. Rekordi i mëparshëm ishte 3.0 gradë, shkruan swissinfo. Në Lugano, mesatarja mujore prej 24.8 gradë ka të ngjarë të jetë e njëjtë me atë të vitit 2003.
Autoritetet panameze dëbuan 30 imigrantë për në Ekuador, fluturimi i dytë i këtij lloji i financuar nga Shtetet e Bashkuara, si pjesë e një marrëveshjeje mes SHBA-ve dhe Panamasë. Marrëveshja ka për qëllim shkurajimin e kalimeve të parregullta të kufirit e reduktimin e flukseve të imigracionit, kryesisht drejt Shtetet e Bashkuara.
Avioni u nis të enjten në mbrëmje për në qytetin bregdetar të Mantës në Ekuador, njoftuan zyrtarë të shërbimit të migracionit të Panamasë. Ata shtuan se imigrantët u dëbuan pasi kishin shmangur një postbllok migracioni, që ndodhet në një korridor mjaft të rrahur nga imigrantët.
Mijëra njerëz kalojnë çdo vit përmes xhunglës së rrezikshme Darien, në kufirin e Panamasë me Kolumbinë, në drejtim të Shteteve të Bashkuara.
Fluturimi i së enjtes pasoi një udhëtim pararendës, të financuar po nga Uashingtoni në mes të muajit gusht, që çoi në dëbimin e rreth 30 imigrantëve për në Kolumbi.
Dëbimi më i fundit vjen disa ditë pasi Presidenti i Panamasë Jose Mulino njoftoi për dëbime të emigrantëve indianë në shtator si dhe shtetasve kinezë, për të cilët nuk dha një datë.
