Analisti Skënder Minxhozi tha në emisionin “Real Story” se çështja “Babalja” nisi si një çështje politike për të goditur Fatmir Xhafajn si ministër në atë kohë dhe si drejtues i tryezës të Reformës në Drejtësi, por që përfundoi në një çështje teknike që fatkeqësisht politika, kur i pëlqen vendimi flet në favor të saj dhe kur nuk i pëlqen e sulmon.
“Kur ishim këtu në studio zotin Salianji, kam thënë se ky ishte një proces me valencë politike. Bëhej fjalë për të goditur drejtpërdrejtë kreun e Reformës në Drejtësi, ish-ministrin dhe opozita ishte në kërkim të një fabule. Sot është një gjyq që luhet pa petkat e politikës më. Nuk është më ai procesi që tronditi Shqipërinë. Tashmë çështja është teknike. Për fat të keq politika thotë se vendimi i gjykatës është i mirë kur i leverdis, kurse kur nuk i leverdis, thotë se nuk është vendim i mirë”, tha Minxhozi.
