CNN ka shkruar një artikull për Shqipërinë dhe për mënyrën se si po përdoren bunkerët dhe ish kazermat ushtarake si vende për të tërhequr turistët e huaj.
Në artikull thuhet se pas përfundimit të pushtetit të Enver Hoxhës në 1985, dhe të regjimit komunist në 1990, vendi ynë trashëgoi 221,143 bunkerë dhe objekte ushtarake, të cilat për dekada kanë shërbyer si kujtime solemne të ditëve të errëta. Media amerikane e nis me shtëpinë e ish diktatorit komunist në Tiranë.
“Rezidenca dykatëshe, duket sikur po rimodelohet në vend që të ruhet. Shtëpia u hap për publikun vetëm një herë në vitin 2018, dhe pak prej tyre kanë qenë brenda, që atëherë. Gjendja aktuale e rezidencës së Hoxhës përmbledh se çfarë ndjejnë shumë shqiptarë për vitet e komunizmit. Duke pësuar një traumë kolektive të mizorisë, shumë do të preferonin të harronin se ai ka ekzistuar ndonjëherë.”, thuhet në artikull.
CNN shkruan se Shqipëria po përjeton një rilindje turistike, e mbështetur nga sipërmarrës dhe emigrantë të kthyer në atdhe, që po i japin një jetë të dytë strukturave ushtarake komuniste, duke i përdorur si restorante që shërbejnë ushqim dhe verë tradicionale si bujtina, muze arti dhe historie.
“Pak hapa larg xhamisë së Et’hem Beut të epokës osmane, në sheshin qendror Skënderbej të Tiranës është një tjetër bunker ushtarak i epokës së Hoxhës. Bunk’Art 2 është muzeu më i rëndësishëm i vendit, që katalogon mizoritë e kryera nën sundimin komunist në Shqipëri dhe ndodhet në një bunker të ruajtur të shkallës bërthamore, që dikur lidhte zyrat politike të qeverisë qendrore. Të gjitha 360 gradët brenda kupolës gri janë të mbuluara me foto, që përkujtojnë viktimat e vrara me urdhër të një drejtuesi, që ishte aq paranojak dhe mizor, sa që vetëm njohja me të mund të vinte jetën tuaj në rrezik.”, shkruan CNN.
CNN përmend edhe ndërtesën ku lindi Enver Hoxha në Gjirokastër, që sot njihet zyrtarisht si “Muzeu Etnografik i Gjirokastrës”.
“Qyteti i Gjirokastrës i epokës osmane në Shqipërinë jugore ka lidhjen e vet me trashëgiminë e Hoxhës, duke qenë vendlindja e diktatorit. Sot, ndërtesa ku ai lindi njihet zyrtarisht si “Muzeu Etnografik i Gjirokastrës”. Vetëm një pllakë mermeri në dyshemenë e një dhome të dekoruar përkujton ardhjen e Hoxhës në botë më 16 tetor 1908.”, shkruan media amerikane.”
CNN ndalet më pas te Kazerma e Cerenit.
“Kazerma e Cerenit, një ish-kazermë dhe kompleks ushtarak i kthyer në një nga restorantet dhe destinacionet më të reja të agroturizmit të qytetit, është ideja e Ismet Shehut, një kuzhinier shqiptar i trajnuar në Mbretërinë e Bashkuar, i cili dikur i shërbente drekën mbretëreshës së ndjerë Elizabeth II.”
Vijon më tej në veri me Fishtën e Lezhës, që është kthyer në një atraksion sa i përket gastronomisë.
“Më në veri, fshati i izoluar bujqësor Fishtë është një vend, që shumë shqiptarë më parë nuk mund ta gjenin as në hartë. Kështu ndodhi derisa lindi destinacioni i agroturizmit Mrizi i Zanave, duke shndërruar jo vetëm tokat e vetmuara bujqësore, por edhe trajektoren historike gastronomike të Shqipërisë. Kodrat e rrumbullakëta, ku tani rriten perime të freskëta për klientët e restorantit ndodhen në një kompleks, që dikur ishte një burg i kohës komuniste.”, thuhet në artikull. /abcnews.al