Presidenti Ilir Meta i çdekretoi zgjedhjet e 30 qershorit me argumentin se do të kishte përplasje civile. Por pas këtyre zgjedhjeve që kaluan të qeta dhe pa asnjë incident, reagimi i parë i presidentit Meta është pikërisht ky konfirmim: zgjedhjet kaluan pa përplasje civile.
“Pas zgjedhjeve të 30 qershorit, reagon presidenti Meta: Urime të gjithë qytetarëve që dje iu larguan konfrontimit dhe dhunës
Urime të gjithë qytetarëve që dje iu larguan konfrontimit dhe dhunës duke respektuar në mënyrë qytetare njëri-tjetrin, pavarësisht nga qëndrimi ndaj votimeve socialiste të thirrura nga kryeministri Rama.
Shqipëria shpëtoi nga kurthi i përplasjes civile, ndaj i falënderoj nga zemra të gjithë shqiptarët që nuk ranë viktimë e retorikës konfrontuese të liderëve të papërgjegjshëm, që përmes nxitjes së dhunës duan të fshehin skandalet dhe llogaridhënien e tyre”, shkruan presidenti në rrjetin social, pikërisht aty ku të dielën e zgjedhjeve publikoi foto nga plazhi.
Më tej presidenti ironizon maxhorancën ndërsa publikon një video ku votimi është kolektiv. Por kujtojmë se raste të tilla ka pasur edhe në zgjedhjet e kaluara.
“Përsa i takon tejkalimeve të planit në votimet socialiste, asnjë surprizë nuk kisha.
Tani me duhet të “shpik” një dekoratë të re, që besoj me ndihmën e Kuvendit socialist do miratohet, atë të “Heroit të votave socialiste”.
Për të shijuar rikthimin e kohës së votimeve kolektive, ju ftoj të ndiqni edhe këtë video”, shkruan Presidenti.
Pavarësisht retorikës së tij, shqiptarët do të kujtojnë se Meta është i pari president që nuk mori pjesë në zgjedhje në historinë e Shqipërisë dhe madje bëri thirrje për bojkot, ndërsa doli bllof dhe me parashikimet për dhunë.