Zëvendëskryeministri Erjon Braçe ka ngritur zërin kundër dhunës ndaj grave, duke iu drejtuar burrave me një mesazh të fortë, pikërisht në ditën kur në gjykatë u paraqit personi i akuzuar për vrasjen makabre të kunatës në Paskuqan. Kjo vrasje ka tërhequr vëmendjen e numrit dy të qeverisë, duke apeluar ndaj “burrërisë” së atyre që u marrin jetën vajzave e grave.
“Java që mbyllet sot, riktheu barbarinë tonë ‘burrërore’ kundër grave e vajzave në këtë vend! Pas çdo krimi qëndron një kriminel, pas çdo vrasje të një gruaje, vajzë, qëndron një barbar!”, thotë Braçe. Në reagimin e tij, Braçe thotë se respekti, dinjiteti dhe dashuria ndaj një gruaje nuk e zhbën “burrërinë”. Për këtë, ai sjell në vëmendje një foto të një prej kompozitorëve më të mëdhenj në Itali, Ennio Morricone duke puthur me përulje dhe respekt dorën e presidentes së Senatit të Italisë, Elisabetta Alberti Casellati.
“Të ngresh dorën e të mbysësh një grua, në këtë vend është bërë e thjeshtë. Po këtë, këtë që sheh në foto a e bën dot? Nuk të zhbën, nuk të humb burrëria prej respektit, dinjitetit, dashurisë, mbaje mend këtë! Dua ta sjell tingullin e jashtëzakonshëm të Ennio Morricone si homazh për gratë e vajzat që barbaria burrërore ju mori jetën këtë javë! Dëgjoje! Mbase kupton çfarë ke bërë!”, shprehet Braçe.