Kongresi miratoi këtë të enjte, në një sesion të përbashkët të dy dhomave, asaj të përfaqësuesve dhe senatit, zgjedhjen e Joe Biden si president i 46 i Shteteve të Bashkuara. Por para se të zyrtarizohej emri i tij si president i SHBA-së, trazira të vërteta ndodhën në SHBA, një skenë e tillë që nuk hamendësohej të ndodhte ndonjëherë.
Nga këto trazira që pasuan me viktima, e gjithë bota e ktheu vemendjen në SHBA, në djepin e demokracisë. Pas mësymjes së dhunshme dhe të paprecedentë të mbështetësve të Trump në Kongres, që çoi në pezullimin e përkohshëm të seancës së certifikimit të fitores së demokratit Biden, Donald Trump premtoi se më 20 janar do të ketë një kalim të rregullt pushteti tek pasardhësi i tij.
Kjo ngjarje është risjellë në fokus të emisionit “Repolitix”. Konstitucionalisti Shkëlqim Hajdari, argumentoi se dhuna në Kongresin Amerikan, është përgjegjësi e institucioneve ligjzbatuese.
“Përgjegjësi shumë e rëndë ndaj forcave të policisë dhe sigurisë. Po ta shikoni, mbrëmë natën dhe sot, po merren me ngritjen e komisioneve hetimore për të parë se si funksionoi policia.
Lufta politike është luftë poltikë. Analiza që bëjnë dy politikanët është korrekte. Duhet të shikojmë që forcat e sigurisë nuk kanë lidhje me luftën politike.
Ai është shtet i madh, ka informacione, shërbime sekrete, shërbime që janë të dukshme dhe të padukshme, masat duhet të ishin marrë shumë të forta. Nëse do ishin marrë masat e forta, ajo ngjarje nuk ndodh. Pavarësisht analizës politike që kush e donte dhe kush nuk e donte…”
Por çfarë ndodhi? Z. Hajdari tha se beson tek politika amerikane, dhe se gjatë ditëve në vijim do të dalin detajet se çfarë nuk shkoi siç duhej.
“Unë besoj tek politika amerikane, kur me dashje, pa dashje, i gjithë lidershipi politik janë distancuar nga dhuna. Nga dita në ditë do të dalin informacionet se ku çaluan gjërat që mos përfundonin në futjen brenda të simbolit të demokracisë amerikane dhe inspirim në të gjithë botën, dhe duhet ti lëmë kohë demokracisë amerikane që pataten e nxehtë ta nxjerrin me kujdes nga zjarri, do ta nxjerrin.
Ngjarja është shumë e rëndë, ajo nuk mbrohet në vende që s’ka fare demokraci, një nga presidentët e ka quajtur që ngjarje të tilla ndodhin në vendet ku janë ‘Republika Bananesh’. Por ka treguar edhe një gjë tjetër, që SHBA i përket popullit”, deklaroi z.Hajdari.