Forcat izraelite sulmuan një spital në Khan Younis, qyteti më i madh në Rripin jugor të Gazës, të cilin e kishin rrethuar për javë të tëra, tha Gjysmëhëna e Kuqe Palestineze.
Aty thuhej se “forcat pushtuese sulmuan Spitalin Al-Amal dhe filluan ta kontrollonin atë” dhe se Gjysmëhëna e Kuqe kishte vështirësi në komunikimin me ekipet e saj në spital.
Spitali Al-Amal është në qendër të një konflikti midis forcave izraelite dhe luftëtarëve nga Hamasi, i cili ka sunduar Gazën që nga viti 2007. Prej disa ditësh organizata joqeveritare e ndihmës mjekësore kërkon që institucioni të mbrohet dhe të mundësohet vazhdimi i furnizimeve, duke theksuar se nuk ka mjaftueshëm oksigjen, ilaçe dhe karburant për gjeneratorët e energjisë elektrike në spital.
Gjysmëhëna e Kuqe tha këtë javë se 8,000 njerëz ishin evakuuar, duke u strehuar në spitalin Al-Amal dhe rreth zyrave të tij lokale aty pranë.
Rreth 40 persona të zhvendosur, 80 pacientë dhe 100 punonjës mbetën në spital pas evakuimit. Edhe pse teorikisht kanë mbrojtje të veçantë sipas ligjeve të luftës, spitalet janë objektiva të ushtrisë izraelite në luftën që filloi në tetor.