Mediat italiane kanë shkruar për historinë e trishtë të shqiptarit Emirjan Vukaj i cili gjeti vdekjen më 28-tetor. Nga Shqipëria ai shkoi për të punuar në Itali në fshatin Giovinazzo, si një punëtor bujqësor për të vjelë ullinj dhe mbeti i vdekur në një aksident. Ai ishte duke shkuar për në punë me biçikletë në orën 6 të mëngjesit kur u godit nga një makinë që drejtohej nga një grua. Megjithëse atij iu dha menjëherë ndihma e parë, nuk arriti t’i mbijetonte aksidentit. Emirjan Vukaj ndërroi jetë.
Për t’i ardhur sado pak në ndihmë familjes së tij në Shqipëri për të tërhequr trupin e të ndjerit komuna e Giovinazzo ka parashikuar riatdhesimin e trupit, dhe ka ngritur dhe një fushatë donacioni e quajtur “Ndihma për familjen e Emirjanit”. Kjo fushatë synon të mbështesë gruan e tij dhe fëmijët Arnis, Andreis dhe Amila, kjo e fundit vetëm 6 vjeç.
Mediat italiane shkruajnë se “ndërgjegjja e secilit prej nesh nuk mund të mos jetë tronditur nga kjo histori e trishtuar, e cila tregon për të huajt që vijnë vetëm për të punuar dhe për të siguruar një të ardhme për ata që kanë mbetur atje, në anën tjetër të detit”.