Një operacion i koduar në shqip “Baba e bir”, nga karabinierët italianë ka çuar në goditjen e një bande hajdutësh që kishin kryer një sërë grabitjesh në Modena. Nëntë persona përfunduan në pranga pas hetimeve të nisura në nëntor 2018 në Borgo Chiese, në Trento.
Të specializuar në vjedhjen e automjeteve dhe bankomateve, grupi veproi në Trento, në Milano dhe gjithashtu në Modena, duke kryer grabitje në vlerën e mbi 100 mijë eurove. Kreu i bandës konsiderohej “Baba”, ndërsa baza operacionale e tyre ishte në zonën e Brescias.
“Babai” kishte nën varësi disa “djem”, tetë prej të cilëve kanë përfunduar në pranga për krijimin e një grupi kriminal, për vjedhje dhe marrjen e plaçkave të vjedhura. Hetimet filluan në nëntor 2018, pas vjedhjes në një bar në qytetin e Borgo Chiese.
Pajisjet e lojërave (playstation) dhe bankomatet ishin shënjestrat e preferuara të grupit, të cilët vetëm në një rast arritën të kryenin një vjedhje të vërtetë kundër një biznesmeneje nga Bresso, në zonën e Milanos. Pas një viti hetimesh, hetuesit kanë arritur të zbardhin 20 vjedhje, 13 nga të cilat në njësi tregtare dhe 7 autovetura. Vjedhja në Valle del Chiese ishte e vetmja e shënuar në Trentino, dhe ishte ky episod që “tradhtoi” grupin.
Mediat italiane publikojnë emrat e shtatë personave të arrestuar, ndërsa nuk saktësojnë se cili ishte kreu i grupit. Sipas mediave italiane, të arrestuarit janë Endri Caushaj, 33 vjeç, Ardian Muca, 39 vjeç, Migen Capatina, 29 vjeç, Bledar Bashmeta, 41 vjeç, Besart Mehmeti, 34 vjeç, Marco Ramunno, 31 vjeç, Lorenzo Macalli, 28 vjeç.
