Bashkia e Tiranës konstituoi ditën e martë 61 këshilltarët e rinj që do të kryejnë mbarëvajtjen e punës dhe menaxhimit të projekteve dhe përmirësimin e jetës së qytetarëve të Tiranës. Këshilli bashkiak u zgjodh nga zgjedhjet e 30 qershorit dhe u mandatuan me vendim të Kolegjit Zgjedhor. Në krye të Këshillit të ri Bashkiak u zgjodh zëvendësministri i Drejtësisë, Toni Gogu dhe nënkryetarë të këshillit u zgjodhën Vjollca Braho dhe Luan Bregasi.
Kryetari i Këshillit të Qarkut Aldrin Dalipi vlerësoi kandidaturën e Toni Gogut për detyrën e kreut të Këshillit Bashkiak të Tiranës dhe shprehu bindjen e plotë në përmbushjen me sukses të detyrës.
“Duke mbështetur maksimalisht propozimin e drejtuesit të grupit të Partisë Socialiste, për kandidaturën e zotit Toni Gogu, si kryetar i ri i këshillit të bashkisë së Tiranës, më lejoni të vlerësoj se zoti Gogu përcjell cilësi shumë të mira qytetare dhe profesionale për këtë detyrë. Me një eksperiencë shumë të vlerësueshme për nga përkushtimi dhe korrektesa, ai ka drejtuar një organizatë të rëndësishme ndërkombëtare si Ëord Vizion për Shqipërinë dhe Kosovën. Po kaq pozitive do të vlerësoja edhe punën e tij në sistemin e drejtësisë, duke lënë gjurmë të posaçme gjatë veprimtarisë së tij deri në detyrën e zv. ministrit të drejtësisë së fundmi”, tha Aldrin Dalipi.
