Analistët e ftuar në studion e emisionit “Real Story” në “News 24” kanë debatuar për reformën në drejtësi duke shprehur qëndrimet e tyre në lidhje me funksionim e saj në mënyrën e duhur. Analisti Fatos Lubonja deklaroi se dyshon shumë tek reforma në drejtësi, për shkak se edhe vettingu u bë në mënyrë selektive, duke mbështetur grupet e lidhura me maxhorancën. Arjan Vasjari u shpreh se do të ishte mirë që të besojmë tek SPAK-u dhe reforma në drejtësi, në kushtet që kjo është e vetmja drejtësi më e mira që njohim. Ndërsa Skënder Minxhozi tha se reforma në drejtësi duhet besuar dhe nuk mund ta gjykojmë, kur ende nuk kemi rezultate.
Pjesë nga debati
Fatos Lubonja: Unë s’po them tani në këtë moment që PS ka kapur të gjithë reformën në drejtësi. Sigurisht që ka “mbeturina” siç thoshte shoku Enver. Por ajo skandali DH Albania ishte që gjithë qeveria duhet të binte.
Skënder Minxhozi: Prokurori i Përgjithshëm nuk merr më vendime. SPAK ka filluar punën. Nuk mund ta atakosh dot kur nuk ka balancë.
Fatos Lubonja: Kjo që thua është shumë e rëndë. Se thua se këta do na bëkan drejtësinë, si shpata e drejtësisë në kohën e Enverit.
Arjan Vasjari: SPAK duhet të provohet. Mos ta paragjykojmë. T’i japim mundësi, sepse nuk kemi mundësi tjetër.
Fatos Lubonja: Kur na kanë folur për reformën në drejtësi na kanë folur në përgjithësi për vetting etj. Madje fjala më e madhe ka qenë vetting sesa SPAK. Madje na kanë thënë se pas vettingut do na dalin njerëz të ndershëm mbi partitë që do të bëjnë pastrimin e politikës. Tani nëse unë shikoj se vettingu bëhet në mënyrë selektive nga grupe që lidhen me maxhorancën, dyshoj shumë te reforma në drejtësi.
Arjan Vasjari: Fol me prova në mundesh.