Një 31-vjeçar është marrë peng në Mat, ku nën kërcënimin e armës është futur në një makinë, por vetëm disa minuta më vonë, policia ka arritur të lirojë pengun, i cili ishte dërguar në një banesë dhe ka arrestuar një nga autorët.
Ngjarja e rëndë ka ndodhur në orët e para të mëngjesit për shkak të një konflikti të hershëm mes palëve, ndërsa policia tha se ka reaguar menjëherë, duke vënë në pranga një nga autorët e këtij krimi dhe shpallur në kërkim tre të tjerë.
“Rreth orës 03:40, Komisariati Mat ka marrë informacion se në lagjen ‘Pjetër Budi’, në Burrel, po ndodhte një konflikt mes disa personave. Menjëherë shërbimet e Policisë kanë nisur hetimet për verifikimin e rastit dhe rezultoi se shtetasi S. L., në bashkëpunim me L. I., M. B., S.L., dhe I.K, për shkak të një konflikti të hershëm dyshohet se nën kërcënimin e armës ka marrë me forcë në automjet shtetasin A. H., 31 vjeç dhe më pas e ka dërguar në banesën e shtetasit I. K., në fshatin Batër e Madhe, Burrel. Falë reagimit të menjëhershëm të policisë dhe hetimeve të kryera nga ekspertët e policisë është bërë i mundur arrestimi i shtetasit S. L., 32 vjeç, banues në Burrel”, deklaroi policia. Po ashtu, policia tha se u shpallën në kërkim dhe po punohet për kapjen e shtetasve S. L., 31 vjeç, L. I, 34 vjeç, M. B., 24 vjeç, të gjithë banues në Burrel, si dhe procedohet penalisht në gjendje të lirë shtetasi I. K.
Policia shpjegoi se gjatë kontrollit në vendin e ngjarjes është gjetur dhe sekuestruar nga policia një kallashnikov me 15 fishekë dhe automjeti tip “Mercedes Benz”, i përdorur për pengmarrjen.