Mbi 800 ushtarakë të NATO-s nga 12 vende të ndryshme të botës, kanë marrë pjesë në stërvitjen
“Albanian Effort 19” që u zhvillua në Bizë në Shqipëri.
Ministrja e Mbrojtjes, Olta Xhaçka ka njoftuar përfundimin e stërvitjes ndërsa shkruan se vetëm brenda 10 vitesh në Aleancë, Shqipëria tregon se Forcat e Armatosura janë shndërruar në një forcë moderne dhe profesionale.
“Shqipëria u anëtarësua në NATO vetëm 10 vjet më parë. Fakti që vetëm një dekadë më pas, Forcat tona të Armatosura janë shndërruar në një forcë moderne e profesionale, e cila është në gjendje të operojë në standardet e NATO-s, është një dëshmi e asaj që e bën Aleancën unike. Mbështetja dhe solidariteti mes aleatëve është ajo që e bën NATO-n një forcë kaq të fuqishme”, theksoi Ministrja e Mbrojtjes në mesazhin e saj.
“Albanian Effort 19” mblodhi në Bizë rreth 800 efektivë nga Shqipëria, SHBA, Mbretëri e Bashkuar, Turqia, Kroacia, Polonia, Italia, Gjermania, Bullgaria, Mali i Zi, Maqedonia e Veriut dhe Kosova. Në 7 ditë përfaqësuesit ushtarakë nga 12 vende aleate dhe partnere treguan se cili është burimi i fuqisë së Aleancës më të madhe ushtarako – politike në botë, anëtare e së cilës vendi ynë është prej 10 vjetësh.
Për shefin e Shtabit të Përgjithshëm të FA, gjeneral brigade Bardhyl Kollçaku, trupat shqiptare po stërviten së bashku me ato të aleancës dhe vendeve partnere për planëzimin dhe kryerjen e operacioneve në përgjigje të krizave dhe për një sërë elementësh të rëndësishëm.
