Nënkryetari i Komisionit Qendror të Zgjedhjeve, i cili mori drejtimin e mbledhjes së KQZ për diskutimin mbi dekretin e Presidentit Meta për shtyrjen e 30 qershorit, pasi Kryetari i KQZ braktisi mbledhjen, u bën thirrje qytetarëve të marrin pjesë në votimet e së dielës. Denar Biba shkruan në një postim arsyet pse duhet që qytetarët të shkojnë në votime, qoftë edhe me një kandidat, ndërsa shprehet se duhet respektuar shteti i së drejtës që prevalon mbi pazaret politike.
Postimi i Bibës
“Në datë 30 qershor, unë do të shkoj të votoj! Po ç’ka për të zgjedhur në 30 bashki ku është regjistruar vetëm 1 kandidat?, do të pyesë me të drejtë ndonjë. Po, ashtu, në ato bashki ka vetëm votim e jo zgjedhje dhe kjo është për të ardhur keq. Por zgjedhje a votime qofshin në gati 50% të zonave, sërish mbeten të rëndësishme, ndaj nuk duhen bojkotuar. Ne (shqiptarët) nuk duhet të humbim shprehitë tona demokratike. Akoma më tej, ne duhet të respektojmë shtetin e së drejtës, i cili kërkon që rregullat të prevalojnë mbi pazaret politike e që, pa të cilin, demokracia ka tendencë të degradojë në sundim të shumicës mbi pakicën. Dhe së fundi, duhet të votojmë edhe sepse procesi zgjedhor, edhe aty ku ka vetëm 1 kandidat, ka edhe një komponent tjetër, absolutisht të rëndësishëm. Të zgjedhurit vendorë përmes votimit qytetar formalizojnë marrjen e detyrës. Sepse kryebashkiakët tanë emërohen nga ne, votuesit e tyre. Vetëm kështu i bëjmë ata të përgjegjshëm dhe mund t’ju kërkojmë llogari për premtimet dhe menaxhimin e parave publike”, shprehet Biba në postimin e tij.