Prokuroria e Posaçme ka regjistruar procedimin penal për skandalin e spitalit tek spitali Onkologjik në Tiranë. Pak ditë më parë Prokuroria e Tiranës shpalli moskompetencë për këtë dosje dhe tashmë SPAK ka regjistruar hetimet për 3 vepra penale, duke nisur nga ajo e kontrabandës së ilaçeve, shpërdorimit të detyrës dhe korrupsionit.
Dy veprat e para ishin ngritur edhe nga Prokuroria e Tiranës, ndërsa me kalimin e kësaj dosje në prokurorinë e posaçme është regjistruar edhe një tjetër akuzë ajo e korrupsionit. Hetimit po zhvillohen nga prokurori Elvin Gokaj, që tashmë ka dorëzuar kërkesën në gjykatën e posaçme për rivlerësimin e masave të sigurisë për të dyshuarit.
Në qershor të këtij viti ishte prokuroria e Tiranës që zbuloi një skemë abuzimi me pacientët e sëmurë me tumor në spitalin Onkologjik në kryeqytet duke caktuar edhe 7 masa sigurie për mjekë dhe personelin e spitalit. “Arrest në shtëpi” u caktua për mjekun Edmond Gashi, i cili dyshohet se është edhe organizatori i të gjithë skemës.
Për personat e tjerë gjykata e Tiranës me kërkesë të prokurorisë vendosi që hetimet të zhvillohen në gjendje të lirë. Sipas hetimeve, në bashkëpunim me njëri-tjetrin, mjekët, specialistët dhe kordinatori i spitalit orientonin pacientët e diagnostikuar me sëmundje tumorale në klinikën private në pronësi të Gashit me qëllime përfitimi.
Gjithashtu, hetimet treguan se në Spitalin Onkologjik u instalua një Aparaturë Kobalto-Terapie për trajtimin e të sëmurëve të diagnostikuar me sëmundje tumorale, por ajo u la jashtë kushteve teknike.
PERSONAT E PERFSHIRE NE SKEMEN E ABUZIMIT
- Edmond Gashi “Arrest Shtëpie”
- Alketa Ymeri “Detyrim Paraqitje”
- Emiljano Lela “Detyrim Paraqitje”
- Halil Gashi “Detyrim Paraqitje”
- Florian Marku “Arrest Shtëpie”
- Brikena Qirjazi “Detyrim Paraqitje”
- Drilona Kishta, “Detyrim Paraqitje”