Një makinë e patrullës së përgjithshme të policisë është përplasur në mesnatë me një automjet, duke shkaktuar plagosjen e komandantit të grupeve të gatshme në Elbasan. Ngjarja aksidentale ka ndodhur pranë shkollës 9-vjeçare Naim Frashëri në Elbasan, ndërkohë që i plagosur ka mbetur oficeri Enver Muça.
Burimet policore thanë se i plagosuri është dërguar në Spitalin Kirurgjik në Elbasan, ku ndodhet nën kujdesin e mjekëve, ndërkohë që grupi hetimor ka nisur verifikimet për të zbardhur shkaqet e këtij aksidenti që ndodhi pak pas mesnatës. Sipas të dhënave paraprake, në polici është shoqëruar drejtuesi i mjetit, por në pyetje është marrë edhe shoferi i makinës së patrullës. Për shkak të veprimeve procedurale që po kryhen, policia ende nuk ka arritur në një konkluzion mbi këtë aksident.