Pensionet e shqiptarëve në Greqi ishin një nga çështjet tek të cilat u ndal ministri i Jashtëm, Igli Hasani në bashkëbisedimin që zhvilloi këtë të enjte me gazetarët.
I pyetur se në cilën fazë janë negociatat, Hasani tha se procesi është më i vështirë se ai që u realizua me Italinë.
Sipas kryediplomatit të Tiranës, një ndër anekset problematike në këtë drejtim është çështja e ndryshimit të emrave, por ai konfirmoi se Shqipëria është gati për ta finalizuar procesin
“Qeveria e ka bërë pjesën e vetë të detyrimit për hartimin saktësimin, definimin e asaj çfarë duhet për marrëveshjen e pensioneve me Greqinë. Nuk është një negociatë shumë e lehtë sepse numrat janë të mëdhenj dhe realitetet janë të ndryshme, por po përpiqemi realisht që këtë ta shtyjmë. Ka shumë tema të hapura me Greqinë dhe ne duam të arrijmë rezultate sa më të shpejta në këtë drejtim. Ne jemi gati, di të them që në ndryshim nga Italia ku negociata ishte shumë e gjatë dhe me shumë anekse, atje nuk kishte të paktën ndryshime emrash. Ndaj kur do të futemi te elementet teknike duhet të jemi të qartë. Shumë shqiptarë që kanë emigruar në Greqi, këto përfitime i marrin kur emigrojnë nga Greqia në vende të tjera të BE-së me të cilat ne kemi marrëveshje”, tha Hasani.