Presidenti i Iranit, Masoud Pezeshkian, njoftoi për herë të parë se disa vende kanë nisur përpjekje për ndërmjetësim për t’i dhënë fund luftës mes Iranit, SHBA-së dhe Izraelit. Sipas tij, çdo negociatë duhet të adresojë palët që, sipas Teheranit, e nisën konfliktin.
Katari, Turqia, Egjipti dhe Omani kanë ofruar ndërmjetësim pas sulmeve të përbashkëta amerikano-izraelite të nisura fundjavën e kaluar. Megjithatë, ministria e Jashtme e Iranit kishte deklaruar më herët se momenti aktual është për mbrojtjen e vendit dhe jo për diplomaci.
Në një postim në rrjetin X, Pezeshkian theksoi se Irani është i përkushtuar për paqe të qëndrueshme në rajon, por nuk do të hezitojë të mbrojë sovranitetin dhe dinjitetin e tij. Ai shtoi se ndërmjetësimi duhet të përqendrohet te ata që, sipas tij, ndezën konfliktin.
Nga ana tjetër, SHBA dhe Izraeli nuk kanë dhënë sinjale për rifillim të bisedimeve. Sekretari amerikan i Mbrojtjes, Pete Hegseth, paralajmëroi rritje të ndjeshme të presionit ushtarak ndaj Iranit, ndërsa ushtria izraelite njoftoi një fazë të re të intensifikuar të operacioneve.
Ndërkohë, brenda Iranit, Fronti Reformist ka kërkuar zgjedhjen e një udhëheqjeje të re dhe lirimin e të burgosurve politikë për të ulur polarizimin e brendshëm dhe për të forcuar pozicionin diplomatik të vendit. Sipas tyre, zgjerimi i sulmeve hakmarrëse mund të dëmtojë mbështetjen ndërkombëtare për Iranin dhe të forcojë konsensusin global kundër tij.