Vala e protestave në Iran ka detyruar autoritetet që të arrestojnë disa persona të akuzuar për rrëzimin e ‘Boeing 737’ në 8 Janar ku gjetën vdekjen 176 persona në bord dhe ekuipazhi, me qëllim që të mos lejojnë përshkallëzimin e tubimeve të fuqishme, të cilat kanë hyrë në ditën e pestë të tyre.
“Irani ka filluar një hetim të gjithanshëm mbi aeroplanin e rrëzuar dhe ka arrestuar disa persona përgjegjës”, tha zëdhënësi i gjyqësorit në Teheran, duke mos treguar numrin e saktë të personave që përfunduan në pranga dhe as identitetin e tyre. Zëdhënësi i gjyqësorit tha gjithashtu se ‘Kutitë e zeza’ të Boeing-ut ukrainas do të dërgohen në Francë për tu analizuar.
Irani më parë kishte pohuar çdo përfshirje në rrëzimin e avionit disa orë pas sulmit me raketa kundër bazave amerikane në Irak në shenjë hakmarrjeje për vrasjen e gjeneral Qassem Soleimani.
Ndërkohë, gjatë një interviste për ‘Global News’ , Kryeministri i Kanadasë, Justin Trudeau ka drejtuar gishtin te përshkallëzimi i dhunës gjë për të cilin ka luajtur një rol qendror në goditjen e Boeing ku gjetën vdekjen 57 kanadezë. “Unë besoj se nëse nuk do të kishte tension, nëse nuk do të kishte pasur një përshkallëzim kohët e fundit në rajon, qytetarët kanadezë do të ishin në shtëpi tani, me familjet e tyre”, tha ai.
Por, nga ana tjetër, protestuesit nuk kanë ndalur protestat e tyre. Studentët në Teheran u mblodhën para universiteteve dhe marshuan sërish drejt sheshit Azadi. Protesta vazhdon të rritet, përkundër kontrollit të forcave të sigurisë dhe arrestimeve të shumta në radhët e protestuesve. Përmes thirrjeve dhe parullave, ata kanë akuzuar pushtetin se ka zëvendësuar elitat intelektuale me fetarë të regjur.
Pas arratisjes për në Holandë të kampiones olimpike të taekwondos, Kimia Alizadeh, dje kapiteni i kombëtares së volejbollit, një personalitet i adhuruar në Iran, Said Marouf, shprehu indinjatën e tij në rrjetet sociale me fjalët; “Shpresoj se Irani ka parë shfaqjen e tij të fundit të mashtrimit dhe marrëzisë”. Ndërsa spikerja ikonë e Televizionit Shtetëror njoftoi dorëheqjen e saj me fjalët; “Nuk mund ta besoja vrasjen e bashkatdhetarëve të mi. Kërkoj falje që ju kam gënjyer për kaq shumë vite”.
Ndërkohë një zyrtari i lartë i drejtësisë iraniane ka paralajmëruar protestuesit të mos marrin pjesë në protesta të mëtejshme antiqeveritare, duke u shprehur se agjentët amerikanë dhe vendet e tjera të huaja dëshirojnë ta përdorin këtë problem për të trazuar opinionin publik, por që ata nuk do të lejojmë që kjo të ndodhë.