Nuk është marrë shumë gjatë me të, ka mjaftuar vetëm një fjali dhe një foto e postuar më herët nga zëdhënësja e qeverisë Elisa Spiropali.
“Amanet mushkat, Baba Xhikja na la!” Ky është komenti i kryeministrit Rama ndaj sulmeve të Ilir Metës në konferencën e së martës ku për mbi 1 orë ai iu drejtuar posaçërisht kreut të qeverisë.
Më këtë fjali duket qartë se Rama po e injoron. Nuk merr fare përsipër t’i kthejë përgjigje, thjesht i bën repost fotos së Spiropalit.
Ndërsa presidenti me një gjuhë shumë të ashpër, akuzoi kryeministrin dhe SHBA për krijimin e një junte kundër tij, për hartimin e komploteve kundër të ardhmes evropiane të Shqipërisë. Ai e akuzoi kryeministrin se ka kapur të gjitha pushtetet në vend. Pas 3 dekreteve për zgjedhjet e 30 qershorit, presidenti propozoi si zgjidhje për krizën zgjedhje presidenciale me votë nga populli, gjë të cilën nuk e parashikon kushtetuta jonë.
Edhe Kryetari i Grupit Parlamentar të Partisë Socialiste, Taulant Balla ka reaguar pas deklaratës së presidentit Meta, duke e cilësuar kreun e shtetit një President që meriton vetëm shkarkimin, ndërsa si politikan, injorimin. “Ne po presim të votojmë Komisionin Hetimor për shkarkimin e tij dhe do të presim pastaj raportin e Komisionit për të miratuar shkarkimin, të cilin natyrisht do ta shqyrtojë Gjykata Kushtetuese, por deri atëherë jemi të vetëdijshëm se do të kemi një President që si njeri meriton keqardhje, si politikan meriton injorim, si president meriton vetëm shkarkim! Dhe për sjelljen prej gaztori cirku sot dhe gjatë gjithë këtyre kohëve, meriton vetëm përqeshje popullore!”, deklaron Balla në reagimin e tij.
