Kreu i qeverisë, Edi Rama, me përulësi ka kërkuar ndihmë nga investitorët në Turqi për të përballuar koston e dëmeve të shkaktuara nga tërmeti. Kryeministri Rama, duke mbajtur fjalën e tij në Konferencën e Investitorëve në Turqi, tha se pas tërmetit, Shqipëria ka pësuar një goditje e rëndë e cila nuk mund të kalohet pa ndihma nga jashtë.
“Asnjëherë nuk do të harrojmë dedikimin në terren të ekipeve tuaja që vendosën jetën në rrezik për të shpëtuar jetë të tjera. Faleminderit që jeni këtij me mua dhe që me kenë krijuar mundësinë të jem këtu. Dëshiroj të falënderoj secilin prej vëllezërve tanë që deri tani ka qenë shëmbëllim. Shqiptarët e të gjitha besimeve të pasur dhe të varfër dhanë dhe vazhdojnë të japin të gjitha ato që kanë. Na kanë ndihmuar të mbledhim një vlerë që për vendin tonë të vogël është shumë. Të moshuar me një pension mujor kanë ofruar strehë për të pastrehët. Të rinj e të reja kanë lënë shkollën, punët për të ardhur në ndihmë të të prekurve nga tërmeti. Nuk ka nevojë të shpjegoj se i gjithë ky solidaritet është larg të qenit mjaftueshëm për të kapërcyer tragjedinë. Po kërkoj dritën në zemrat tuaja. Drita më e çmuar është ajo që të vjen në orën më të errët. Kjo dritë pa tek Turqia një prej rrezeve të saj. Turqia e provoi edhe njëherë që i përmbahet urtisë së saj dhe nuk braktisi një mik dhe si thotë një shprehje e vjetër të ecësh me një mik në errësirës është më mirë se i vetëm në dritë. Kam ardhur këtu t’iu falënderoj për 500 banesat e t’iu kërkoj të jeni pranë nesh. Kurani na mëson se katastrofat njerëzore janë sprova. Dua që katastrofa që po kalojmë të kthehet në frymëzim, dhimbja të kthehet në forcë”, u shpreh Rama përballë investitorëve turq.
Më tej, ai vuri në dukje se katastrofa ka përkulur qytetet tona më të rëndësishme. “Dua të besoj se edhe me ndihmën tuaj do arrijmë të bëjmë për Durrësin atë që Turqia bëri për Izmirin. Shumica e ndërtesave të shkatërruara janë struktura shumëkatëshe me nja dhjetëra familje. Ne besojmë se dëmi i shkaktuar shkon përtej asaj që është njerëzisht e përballueshme për ne. Përtej debateve tokësore le të kemi besim se zoti pranon vetëm atë që është e drejtë. Ju kërkoj falje që ndërhyra në konferencën tuaj, ju falënderoj me zemër për durimin”, tha Rama.
Kryeministri Edi Rama është takuar mëngjesin e së dielës në Turqi me presidentin e Turqisë Recep Tayip Erdogan. Ai ka ndarë një video me momentet e takimit të dy liderëve. Presidenti i Turqisë Erdogan ka deklaruar se shteti turk do të ndërtojnë 500 banesa për familjet të cilat tërmeti i la në qiell të hapur. Rama tha se është në komunikim me agjencinë shtetërore të strehimit të Turqisë që premtimi i Erdogan për 500 shtëpi të fillojë të realizohet aty ku është dhe blloku më kompakt dhe hapësira më e mundshme për të vepruar tani është Laçi.