Kryeministri Rama e ka nisur të enjten me një lajm të mirë, ka përfunduar rikonstruksioni i rrugës Burrel-Klos, një aks tejet i amortizuar dhe që prej dekadash nuk ishte prekur me dorë.
Kryeministri publikon disa foto ku duket qartë transformimi i kësaj rruge që lidh dy qytetet Burrel – Klos dhe fshatrat përreth.
Rama shkruan se dikur njerëzit hiqnin picirr për të kaluar në këtë rrugë.
“Me pamjet e rrugës Burrel-Klos, ku siç u zotuam, u vu dorë pas 30 vjetësh, e u lehtësua barra e rëndë e gjithë atij mileti, që për dekada hoqi picirrin në atë aks skandaloz, ju uroj një ditë të mbarë”, shkruan Rama.
Ndërtimi i kësaj rruge ishte një zotim i qeverisë, e cila financoi ndërtimin e saj duke dhënë një fond prej 3.7 milionë eurosh. Ndërtimi i rrugës ka nisur një vit më parë.
Segmenti Klos-Burrel ishte një aks problematik, pjesë e rrugës nacionale Milot-Peshkopi. Ai iu nënshtrua rehabilitimit të plotë në të gjithë gjatësinë e tij 18.6 km.
Me rikonstruksionin e këtij aksi distanca mes Klosit dhe Burrelit përgjysmohet dhe e gjithë zona do të ketë përfitime ekonomike.