Vetëm pak minuta pas votimit në Kuvend për ngritjen e Komisionit Hetimor për shkarkimin e Presidentit dhe në kohën kur në bulevardin kryesor të Tiranës po mblidhen mbështetësit e opozitës për protestën e dhjetë të tyre, Ilir Meta ka bwrw thirrje pwr protesta, duke u shfaqur hapur si një kryetar opozite.
“Ju ftoj të vazhdoni të protestoni vetëm paqësisht, për ta bërë kauzën tuaj edhe kauzën e shumicës së atyre që u detyruan të merrnin pjesë në farsën e 30 qershorit. Nga ky test shumë i rëndë ku u provokua demokracia jonë dhe bashkëjetesa qytetare, kjo kauzë i ka të gjitha mundësitë për të dalë shumë më e fortë vetëm përmes rezistencës qytetare dhe paqësore. Ju lutem dhe për sa më pak zhurmë sot, në respekt të organizatës socialiste në KQZ, që po punon ditë e natë të përputhë rezultatet, me tejkalimet e shfrenuara që vazhdojnë çdo moment”, ka deklaruar Presidenti Meta në mesazhin e tij.
Kreu i shtetit ka folur me të njëjtën gjuhë si opozita për 30 qershorin, duke vënë theksin te pjesëmarrja, si i vetmi ushtar i mbetur në fushën e betejës përballë njohjes së 30 qershorit edhe nga ndërkombëtarët. “Ndërsa drejtuesit e Opozitës së Bashkuar ju kanë ftuar sot në një protestë kombëtare kundër votimeve socialiste të 30 qershorit, dua të përshëndes mbi 85% të qytetarëve, të cilët bojkotuan një proces ‘fake’, më të shëmtuarin që mund të ndodhte në kontinentin tonë të civilizuar, pas 3 dekadash që kur vendi ynë u nda nga regjimi më shtypës i të drejtave të njeriut që njohu e gjithë Europa ish-komuniste. Ndaj një mirënjohje të gjithë shqiptarëve, të cilët bojkotuan farsën më të turpshme që mund të bënte vendi në këto momente kur klasa politike duhet të tregonte përgjegjësi dhe vizion europian”, deklaroi Meta.
Sipas tij, për këtë ka meritë kreu i opozitës, Lulzim Basha, që ka ndihmuar shumicën e shoqërisë të identifikojë Edi Ramën, si armikun e dialogut, pavarësisht se ky i fundit, ka bërë 7 letra publike për Lulzim Bashën për dialog para zgjedhjeve të 30 qershorit dhe menjëherë pas përfundimit të tyre, u tregua sërish i gatshëm për dialog, rrugë që la të hapur për opozitën edhe në seancën për shkarkimin e Metës, kur foli për ndryshimet e Kodit Zgjedhor.
“Për këtë ka meritë dhe distancimi i prerë dhe i qartë i lidershipit tuaj, nga çdo akt dhune në dy javët e fundit që ndihmoi shumicën dërmuese të shoqërisë tonë për të identifikuar armikun e betuar të dialogut në këto 6 vite në vendin tonë, i cili ka mbijetuar vetëm përmes diversionit, përçarjes së opozitës, blerjes së zgjedhjeve përmes aktivizimit të “çunave problematikë” dhe lobingjeve të shfrenuara për t’i mbyllur sytë gjithë botës për të mos parë një maskaradë të gjithanshme, që kulmoi me të Dielën e Fitorjeve, plot tejkalime të shfrenuara”, deklaroi Meta.