Skënder Minxhozi: Dita kur Ilir Meta bënte mirë të heshtte

Nga Skënder Minxhozi

Të dish të heshtësh, shumë shpesh, është po aq e rëndësishme sa të dish të flasësh. Një mësim i thjeshtë jete për cilindo që ka provuar me pezmatim koston e fjalëve të thëna pa vend. E kishte një rast për të heshtur edhe presidenti i Republikës sot, më 21 janar, por vendosi ta shpërfillë. Paçka se Ilir Meta është ndoshta njeriu më i interesuar në këtë vend, që të mos hyjë në hollësitë e kësaj date, kur fati i tij politik u përkthye brenda orësh në një tragjedi që vazhdon të mbajë pezull një pjesë të kujtesës tonë kolektive.

Lexojeni çfarë na thotë sot Presidenti për 21 janarin e vitit 2011: Ai 21 janar na kujton se politika ka përdorur dhunën për të arritur objektivat politike në mënyrë të pandershme! Pra, sipas presidentit, edhe nëntë vjet pas atij krimi shtetëror të pandëshkuar ende, teorema mbetet ajo më banalja, e prodhuar pak orë pas vrasjeve: opozita manipuloi protestuesit, ju mbushi xhepat me gurë dhe i yshti për dhunë ndaj godinës së qeverisë dhe i shtyu drejt dhunës.

Se ç’ndodhi më pas, se cila qe dinamika e asaj që pasoi, fajtorët e humbjes së jetëve, e vërteta mbi shkallën dhe përmasat e dhunës, tensioni real që u prodhua në bulevard, sjellja e policisë, Gardës, fakti që vetëm njëra palë posedonte dhe përdori armë, vendi ku u vranë viktimat (larg perimetrit të Kryeministrisë) – të gjitha këto nuk kanë as edhe një gram rëndësi për Ilir Metën. Për të ka rëndësi të kapet fort, si aleati i tij më jetëgjatë në politikën shqiptare, Sali Berisha, pas qerres pa rrota të grushtit të shtetit, të cilën s’e besoi as edhe për sekondë as ai që e shpiku.

Deklarimi i Presidentit se 21 janari ishte fryt i protestuesve të manipuluar, e jo i shtetit me kobure në brez e të dalë mendsh, është në fund të fundit një përpjekje e tij për të shpëtuar alibinë politike të janarit 2011. Kjo duket dhe është e lexueshme që larg. Pyetja është një tjetër: përse Ilir Meta kërkoi të zbulojë kot petët e këtij lakrori të sikletshëm sot, kur mund të kishte hedhur në rrjetet sociale ndonjë nga fotot me ngjitje malesh apo me fitoret e Celltikut? Pse kërkoi të kthehet në vendin e një krimi shtetëror, duke e ditur se 21 janari është një ndër ato ngjarje kur shteti ka vetëm alibinë qesharake dhe krejt cinike “s’kam faj unë pse erdhët, meqë erdhët ju vrava”!

Është krijuar një komision hetimor për puçin e 21 janarit. Njëri ndër turpet e parlamentarizmit shqiptar. Një komision me tre kryetarë që shkonin e vinin, por pa raport final. Kërkojeni raportin final të këtij komisioni, pyesni edhe juristët e famshëm të PD në Kuvend që kanë qenë anëtarë të tij. Ku e kanë raportin nal të punës së tyre hetimore? S’ka raport sepse s’ka patur puç! Ka patur vetëm një vrasje në seri në bulevard, e që sot Ilir Meta bën sikur s’e kujton. Logjika e Presidentit rezonon në mënyrë shumë të çuditshme me atë që ndodhi vitin e shkuar në të njëjtin vend, pra tek kryeministria.

Me këtë manipulimin e protestuesve që thotë Meta, i bie që në dhjetë protestat e dhunshme të opozitës nga shkurti deri në majin e vitit 2019, të ishin vrarë nja 50-60 veta dhe qeveria të mos merrte asnjë përgjegjësi mbi vete. Sepse, siç ka thënë Presidenti, “ai 21 janar na kujton se politika ka përdorur dhunën për të arritur objektivat politike në mënyrë të pandershme”. Po e berë në det, thonë vlonjatët, kripa ta sjell në gjellë. 21 janari tashmë është një ngjarje që mund të zbardhet vetëm nga SPAK. Është detyrim historik ndaj të vrarëve, që të bëhet transparencë mbi atë akt ekstrem të papërgjegjshmërisë shtetërore. Ndoshta kështu do të moderojnë fjalët edhe ata që janë mësuar të vijojnë me përrallat bajate të propogandës zyrtare të asaj kohe të çmendur, kur shteti vriste shtetasit e vet…

Lala: Sistemi është i korruptuar, Ngjela: S’i përgjigjem psikozës popullore me profesion

Hetimi dhe vendosja e drejtësisë për çështjen e 21 janarit ka krijuar debat në emisionin “Real Story” në News 24 mes gazetares Klodiana Lala dhe avokatit Spartak Ngjela. Avokati Ngjela tha se çështja e 21 janarit mund të rihapet për shkak se këtë e përcakton ligji i ri, i cili ka ndryshuar pasi dikur Prokuroria e Përgjithshme ka qenë e centralizuar dhe se ishte prokurori i përgjithshëm, në rastin për mbylljen e dosjes së 21 janarit, Adriatik Llalla i cili mund të bënte çdo gjë dhe si përfundim doli njeriu më i korruptuar i Shqipërisë.

Ndërsa gazetarja Lala u shpreh skeptike se kjo çështje do të hapej dhe diskutohej nga SPAK.

Pjesë nga debati:

Spartak Ngjela: Mos u pajto me logjikën time

Klodiana Lala: Pa diskutim që sistemi është i korruptuar por jo të gjithë gjyqtarët dhe juristët janë të korruptuar

Sparak Ngjela: Nuk mund t’i përgjigjem psikozës popullore me profesion

Klodiana Lala: Si mund të hapet çështja

Spartak Ngjela: Është ligji i ri i hap të gjitha çështjet. Por harroni një gjë, Prokuroria e Përgjithshme ka qenë e centralizuar. Ku e keni Llallën. Ka qenë më i korruptuari i Shqipërisë. Ndalonte çdo hetim ja garantonte ligji. Lëreni shtetin të punojë. Prokurori i Përgjithshëm mund të bënte çdo gjë.

Klodiana Lala: Të dhënat e serverit janë diku. Por nëse nuk i shkojnë Prokurorisë ç ‘vlerë ka. Uroj që të jetë e vërtetë ajo çfarë deklaroni që SPAK e ka serverin. I bie që të gjitha dosjet, për shembull Aldo Bare me logjikën e Ngjelës duhet t’i rihapet dosja.

Spartak Ngjela: Vetëm korrupsioni i lartë, që të shkojnë deputetët dhe gjithë ministrat por s’kemi ligjin për këtë. S’më besoni që ligji është kështu?

Braçe: Berisha i pranoi me zë e figurë pushkatimet, asnjë s’e hetoi

Në përvjetorin e 9 të 21 janarit 2011, ku u vranë 4 protestues në bulevardin e Tiranës nga Garda e Republikës, zëvendëskryeministri Erion Braçe vijon të kërkojë drejtësinë e munguar për dy nga përgjegjësit që ai i cilëson kryesorë të kësaj tragjedie, ish-kryeministrin Sali Berisha dhe ish-ministrin e Brendshëm Lulzim Basha. Braçe thotë se Berisha e ka pranuar me zë dhe figurë se urdhëroi pushkatimet dhe asnjë kryeprokurorë gjatë këtyre 9 viteve nuk e hetoi. Braçe e cilësoi ngjarjen e pazbardhur nga drejtësia si torturën më të rëndë për familjarët e viktimave si dhe një torturë personale edhe për të në këto 6 vite pushtet të socialistëve.

Braçe thekson se drejtësia nuk mund të mjaftohet vetëm më shkarkimin e gjyqtarëve dhe prokurorëve që dhanë vendimet për të shfajësuar ata që qëlluan mbi protestuesit, por të vihen para përgjegjësisë edhe urdhëruesit.

“Në 21 janar 2011, katër qytetarë të zakonshëm, pjesëmarrës në një demonstratë të opozitës së kohës, të pa armatosur e paqësore, u pushkatuan në mes të bulevardit Dëshmorët e Kombit; Mbi 12 të tjerë u plagosën me të njëjtat armë zjarri, për fat edhe sot në jetë!

Sistemi kriminal gjyqësor i emëruar e nën sundimin e Sali Berishës edhe sot, bëri që: Pushkatimet e Ziver Veizit, Hekuran Dedes, Faik Myrtajt, t’i cilësojë “vrasje nga pakujdesia”!; Pushkatimin e Aleks Nikes, ta shpallë edhe pas 9 vitesh “vrasje pa autor”!

Sali Berisha i ka dalë për zot pushkatimeve; Me zë e me figurë, fill pas dëshmisë televizive të pushkatimeve në mes të ditës e në mes të bulevardit, ai tha troç se i kishte urdhëruar vetë! Asnjë prokuror nuk e hetoi ne cilësinë e kryeministrit që ka urdhëruar pushkatimet;

Katër prokurore të përgjithshëm janë ndërruar ne 9 vite, Sali Berisha vijon të marrë përsipër pushkatimet dhe, asnjë nuk guxoi dhe nuk guxon as tani, ta vërë nën hetim për krimin e rëndë. As atë tjetrin, ish ministrin e Brendshëm Lulzim Basha, i cili kishte nën komandë pushkatarët e Gardës së qeverisë.

Këta që emëronin prokurorët e gjykatësit e kishin në xhep imunitetin, por kriminalisht i dhanë imunitet, shpëtuan, nxorën nga burgu dhe sot janë të lire, dy pushkatarët plumbat e të cilëve, qitur nga armët e qeverisë, u gjetën në trupat e pa jetë të Hekuran Dedës, Ziver Veizit, Faik Myrtajt. Edhe Aleks Nika nga ata është pushkatuar. Padrejtësi më të madhe se kjo, në këtë vend nuk ka! Kjo padrejtësi rrënon, themelet e shtetit, bën të pavlerë çdo akt rutine drejtësie!

Në 9 vite e gjysëm, kjo padrejtësi është tortura më e rëndë për familjarët e tyre; Në 6 vite e gjysëm në pushtet, torturë është edhe për mua. Çdo 21 janar, me turp e kokëulur shkruaj rradhë si këto, një akt pafuqie që nuk shtyn për drejtësi, nuk bën drejtësi.

Reforma në Drejtësi, ka nxjerrë jashtë nga sistemi 8 gjyqtarë të vegjël e të lartë, të cilët dhanë vendimet kriminale e shfajësuan pushkatarët e 21 janarit. Por kjo nuk është drejtësi! Drejtësi është hetimi i plotë, gjithëpërfshirës i gjithë zinxhirit të krimit, nga urdhri e urdhërdhënësi deri tek pushkatarët e pushkatimi” shkruan ndër të tjera Braçe

View this post on Instagram

KATER BURRA, NJE JETE, PUSHKATIMI DHE, PADREJTESIA QE RRENON THEMELET E SHTETIT! Ne #21JANAR2011, kater qyetetare te zakonshem, pjesmarres ne nje demonstrate te opozites se kohes, te pa armatosur e paqesore, U PUSHKATUAN ne mes te bulevardit Deshmoret e Kombit; Mbi 12 te tjere u plagosen me te njejtat arme zjarri, per fat edhe sot ne jete! Sistemi kriminal gjyqesor i emeruar e nen sundimin e Sali Berishes edhe sot, beri qe: Pushkatimet e Ziver Veizit, Hekuran Dedes, Faik Myrtajt, ti cilesoje “vrasje nga pakujdesia”!; Pushkatimin e Aleks Nikes, ta shpalle edhe pas 9 vitesh “vrasje pa autor”! Sali Berisha i ka dale per zot pushkatimeve; Me ze e me figure, fill pas deshmise televizive te pushkatimeve ne mes te dites e ne mes te bulevardit, ai tha troc se i kishte urdheruar vete! Asnje prokuror nuk e hetoi ne cilesine e kryeministrit qe ka urdheruar pushkatimet; Kater prokurore te pergjithshem jane nderruar ne 9 vite, Sali Berisha vijon te marre persiper pushkatimet dhe, asnje nuk guxoi dhe nuk guxon as tani, ta vere nen hetim per krimin e rende. As ish ministrin e Brendshem Lulzim Basha, i cili kishte nen komande pushkataret e Gardes se qeverise. Keta qe emeronin prokuroret e gjykatesit e kishin ne xhep imunitetin, por kriminalisht i dhane imunitet, shpetuan, nxorren nga burgu dhe sot jane te lire, dy pushkataret plumbat e te cileve, qitur nga armet e qeverise, u gjeten ne trupat e pa jete te Hekuran Dedes, Ziver Veizit, Faik Myrtajt. Aleks Nika nga ata eshte pushkatuar. PADREJTESI ME TE MADHE SE KJO, NE KETE VEND NUK KA! KJO PADREJTESI RRENON THEMELET E SHTETIT, BEN TE PAVLERE CDO AKT RUTINE DREJTESIE! Ne 9 vite e gjysem, kjo padrejtesi eshte tortura me e rende per familjaret e tyre; Ne 6 vite e gjysem ne pushtet, torture eshte edhe per mua. Cdo 21 janar, me turp e kokeulur shkruaj rradhe si keto, nje akt pafuqie qe nuk shtyn per drejtesi, nuk ben drejtesi. Reforma ne Drejtesi, ka nxjerre jashte nga sistemi 8 gjyqtare te vegjel e te larte, te cilet dhane vendimet kriminale e shfajesuan pushkataret e 21 janarit. Por kjo nuk eshte DREJTESI! Drejtesi eshte hetimi i plote, gjitheperfshires i gjithe zinxhirit te krimit..LEXO E PLOTE NE FACEBOOK

A post shared by Erion Brace (@erionbrace) on Jan 21, 2020 at 8:31am PST

“Gërdeci” e “21 Janari”, maxhoranca premton: SPAK do të hapë dosjet e bujshme

Megjithëse opozita dhe presidenti sulmojnë vazhdimisht reformën në drejtësi, maxhoranca është e vendosur ta çojë deri në fund këtë nismë me ndihmën e ndërkombëtarëve, ndërkohë që në shtator pritet ngritja e SPAK. Sipas përfaqësuesve të maxhorancës qeverisëse kjo strukturë e rëndësishme jo vetëm do të hetojë dhe do të vendosë para ligjit politikanët e korruptuar, por do të hapë edhe dosjet e bujshme, siç janë Gërdeci, 21 Janari apo abuzimet në rrugën Durrës-Kukës për të cilat akuzohet direkt kreu i opozitës, Lulzim Basha.

Këtë e ka deklaruar zëvendësministri i Mbrojtjes, Petro Koçi në një prononcim për gazetën “Sot”, i cili thekson se pikërisht kësaj i trembet opozita, ndaj dhe mori vendime ekstreme, siç ishin djegia e mandateve dhe bojkoti i zgjedhjeve të 30 qershorit.

“Besoj se SPAK do të godasë pa dallim korrupsionin e çdo ngjyre. Këtë e beson edhe PD dhe LSI. Prandaj ata nuk lanë gur pa lëvizur kundër riformimit të sistemit të drejtësisë. Ata nuk hynë në zgjedhje dhe dogjën mandatet personale parlamentare me qëllimin e fshehur që të krijohej kaos politik e institucional, zgjidhja e të cilit do të përfshinte rrëzimin e reformës në drejtësi dhe hartimin e një tjetre që të ruante ndikimin e PD-LSI mbi gjyqtarët. Çështje të tilla si “21 Janari”, shitja e hapësirës detare apo afera e Rrugës së Kombit presin dritën e drejtësisë”, deklaroi Koçi.

Edhe deputeti i PS, Andrea Marto deklaroi se ka ardhur koha që në Shqipëri të hapen dosjet e bujshme. Sipas tij, në kushtet kur shumë çështje janë groposur, i takon SPAK që të rivendosë drejtësisë e munguar. “Dosjet e bujshme duhet të rihapen nga SPAK. Çdo gjë duhet të rihapet. Kushdo që ka bërë shkelje, të dalë para drejtësisë. Nëse janë të rrezikuar, le t’ia lamë hetimit të plotë dhe të pandikuar”, deklaroi Marto. Ndërkohë, deputeti socialist, Bujar Çela gjatë një prononcimi për gazetën “SOT” deklaroi dje se SPAK duhet të hapë dosjet e të korruptuarve, veprim ky që sipas tij, do t’i sillte dobi vendit në çdo aspekt. “Hapja dosjeve të ish-ave dhe atyre që janë në xhiro mbi kokën e fukarasë do të sillte shumë të mira që nga sekuestrimi i pasurive, deri në qilizmën që pret populli t’i bëhet këtij sistemi tejet të korruptuar në çdo qelizë”, deklaroi Çela.

Siç duket shtatori do të jetë një muaj i nxehtë për politikën në Shqipëri dhe pritet të ketë zhvillime të shumta.

Meta: Klima nuk pengon zgjedhjet lokale (por atëherë nuk ishte president)

Fatkeqësisht, situata politike aktuale ka dy anë të medaljes; e para sepse vendi është futur në spirale të rrezikshme të krizës politike, që po degradon drejt një konflikt civil, dhe e dyta, fatmirësisht (por jo në kontekstin parësor), klasa politike aktuale është ajo që “sundon” këtë vend prej tre dekadash këtë vend, ndaj në kujtesën e gjithsecilit nuk mund të fshihen disa deklarata të bërë nga këta politikanë, që aktualisht kanë futur vendin në këtë labirint.

E tillë është një deklaratë e bërë nga Ilir Meta menjëherë pas 21 janarit 2011, pikërisht, në datën 13.02.2011, kur fliste para simpatizantëve të LSI-së. Atë periudhë, kur sapo ishte mbajtur protesta e 21 janarit, ku për shkak të publikimit të videopërgjimeve, ku Meta shihej së bashku me ish-ministrin e LSI, Dritan Prifti (tashmë i ndarë nga jeta), katër qytetarë humbën jetën para kryeministrisë në protestën e organizuar asokohe nga opizta socialiste.

Meta, i cili më pas u largua nga posti i ministrit në kabinetin e qeverisë Berisha, deklaronte se tre muaj para se zgjedhjet e majit 2011 për pushtetin lokal do të mbaheshin, pavarësisht klimës së tensionuar politike në vend dhe vrasjes së katër protestuesve të pafajshëm, të cilët dolën për të protestuar pikërisht për shkak të një videopërgjimi. Për më tepër, ndiqni dhe gjykoni vetë deklaratën e Ilir Metës, kur zotohej se klima politike nuk do të ndikonte në zgjedhjet lokale, por, kjo deklaratë bëhej në një kohë kur Meta nuk ishte president.

Kandidati i PS për Matin, Bashës: Ti më sulmon se nuk zbatova urdhrin për të qëlluar protestuesit

Ish gardisti Agron Malaj, i cili sot është kandidat i Partisë Socialiste për Bashkinë e Matit, ka reaguar pas akuzave të kreut të PD-së, Lulzim Basha, si pjesë e gardistëve në protestën e 21 janarit, duke i cilësuar këto deklarata si “shpifje” dhe hedhur akuza ndaj kryedemokatit.

Përmes një postimi në Facebook, Malaj thotë se më 21 janar 2011, ai nuk ka zbatuar urdhrat që vinin nga Basha, ndërsa thekson se kurrë nuk ka abuzuar me detyrën për të qëlluar mbi protestuesit.

“Më 21 janar 2011 unë nuk kam zbatuar urdhrat që vinin nga Ju dhe më lart për të qëlluar mbi qytetarët. Ju më akuzoni se guxova të mos respektoj urdhrat tuaj. Nuk është mëkat të bësh detyrën e një komandant seksioni të njësisë speciale, por unë me atë detyrë nuk abuzova kurrë. Nuk qëllova kurrë mbi protestuesit, as unë dhe asnjë nga ata nën drejtimin tim. Ndaj ti më sulmon. Kjo është e provuar ligjërisht nga drejtësia shqiptare, e cila brenda 48 orëve vendosi ndaj meje pushimin e çështjes sepse nuk kishte asnjë element të veprës penale. Lulzim, njësoj si në 2011 kur nuk i kursyet shpifjet për të devijuar hetimet e 21 janarit nga përgjegjësit e vërtetë, një ndër të cilit jeni dhe Ju, njësoj shpifni edhe sot ndaj meje. Ju ishit ministër i Brendshëm asokohe dhe i dini mjaft mirë fajtorët, i dini mjaft mirë kush i zbatoi urdhrat për të qëlluar mbi protestuesit”, shkruan mes të tjerash Malaj.