Presidenti i Federatës së Futbollit të Kosovës, Agim Ademi është dënuar me 9 muaj burg, pasi akuzohet për veprën penale të “Kërcënimit me vdekje” ndaj një personi. Vendimi është marrë nga gjyqtarja Valbona Musliu-Selimaj në Gjykatën e Prishtinës.
Veç Ademit, është dënuar dhe një tjetër person, Muharrem Rama, për të cilin gjykata ka vendosur një vit burgim, shkruajnë mediat në Kosovë. Agim Ademi dhe Muharrem Rama, akuzoheshin për veprat penale të detyrimit dhe ushtrimit të ndikimit. Aktakuza ndaj Ramës dhe Ademit është ngritur me 14 janar 2014, në bashkëpunim të Prokurorisë Themelore të EULEX-it, me Prokurorinë Themelore në Prishtinë.
Hetimi për Agim Ademin ka nisur në vitin 2014, ndërsa akuza për të është ngritur nga prokurori i EULEX-it, Maarten Groothuizen dhe prokurori Ilaz Beqiri në Prishtinë. Sipas prokurorisë ata kishin qenë persona zyrtar kur kanë bërë ndryshimin e statusit të njw parcele toke duke e shndërruar nga zona e gjelbëruar në zonë ndërtimore. Të dy të akuzuarit, dyshohet se gjatë periudhës 12 korrik-12 shtator 2012, me qëllim përfitimin material, kanë kërcënuar një person, emri i të cili është Dritëro Kadolli.
Ademi dhe Rama i kanë kërkuar viktimës që t`u japë një shumë prej 30 mijë eurosh si dhe një mjet tip “BMË X5”, që pretendohej se do t`i dorëzohej kryetarit të Asamblesë Komunale të Prishtinës, Sami Hamiti. Ndërkohë, kreu i këshillit Komunal të Prishtinës, pasi të merrte përfitimet materiale, do të bënte ndryshimin e statusit të një ngastre toke nga “zonë e gjelbër” në “zonë ndërtimore”.