Ahmetaj: Në 10 mars nisim rindërtimin

Ministria e Rindërtimit prezantoi të dielën platformën online, ku qytetarët që u prekën nga tërmeti i 26 nëntorit do të aplikojnë për të përfituar nga programi i rindërtimit. Ministri Arben Ahmetaj prezantoi në mënyrë të detajuar platformën, e cila do të jetë e hapur për qytetarët në datën 29 janar. Ministri shtoi se për aplikimin do të ketë afat për 30 ditë. Ahmetaj u shpreh se në çdo bashki, që u prek nga tërmeti, do të ketë një zyrë të posaçme ku punonjës të trajnuar do të plotësojnë aplikimin për qytetarët e prekur nga tërmeti.

“”Nga e mërkura do duhet të ketë në çdo bashki nga një zyrë, ku jo qytetarët duhet të vijnë tek ju, por të merrni qytetarët për të bërë aplikimin online. Platforma bazohet në vetë deklarimin e qytetarëve. Do të deklarojnë dëmet. Të gjitha Bashkitë do të dërgojnë tre persona që do trajnohen nesër në orën 11:00, procesin e aplikimit. Që të kenë të saktë zonën, sipërfaqen e banesës. Kryetari i njësisë administrative do e marrë me shkrim, njësia administrative e hedh online. Aty ku qytetari ju jep të drejtën të mblidhi dokumentacionin vetë, atëherë do ia merrni ju. Është detyra juaj. Kemi bërë një manual të detajuar.

Fillon vlerësimi dhe apelimi, brenda fazës së dytë. Për 30 ditë duhet të ketë mbaruar aplikimi me dosjet e shoqëruara. S’ka të bëjë të ketë akt pronësie. Çdo njëri nga ne ka një dokument të tillë në lidhje me pronësinë, përveç atyre që nuk kanë filluar procesin e legalizimit dhe s’kanë asnjë dokument. Në bazë të saj, do ta shikoni që dy janë programet kryesore. Rindërtimi, pallate dhe banesa private. Rikonstruksioni.

Do të ketë një sistem pikëzimi që do të bëhet automatikisht online dhe ku banesat më prioritare do të ndërtohen të parat. Bëhet në mënyrë automatike. Më 6 shkurt mbaron procesi në Entin e banesave e prokurimit për modelet modulare, por që janë anti sizmike euro-kod. 7-10, njësitë e autorizuara do të hapin prokurimet për njësitë individuale. Në datën 10 mars ne shpresojmë të kemi kompanitë e para për ndërtimin”, tha ndër të tjera Ahmetaj.

Rikthehet Superliga, Ahmataj kërkon fitore ndaj Kukësit

Pas shtyrjes së kampionatit për shkak të gjendjes së jashtëzakonshme të krijuar nga tërmeti, Superliga rikthehet të shtunën me tre sfida. Bylisi pret Partizanin, Luftëtari pret Vllazninë ndërsa Tirana pret Kukësin në “Selman Stërmasi”. Në prag të kësaj sfide, trajneri i bardhebluve, Julian Ahmataj foli për mediat. Ai u shpreh se skuadra është në gjendje të mirë, ndërsa tha se përballja ndaj Kukësit duhet fituar.

“Gjendja e skuadrës është e mirë. Problemet si të tërmetit kanë kaluar, por besoj që kemi punuar shumë këto kohë. Kemi vënë disa gjëra në rrugën e duhur dhe shpresojmë t’i marrim benefitet kësaj pune të bërë. Unë s’mendoj se Tirana s’ka qenë ndonjëherë favorite. Për ne është ndeshje e radhës që duhet fituar si çdo ndeshje e kampionatit. Për ne vlen 3 pikë, jo më shumë se aq”, tha Ahmataj.

Bardheblutë i presin dy sfida të rëndësishme, Kukësi dhe më pas derbi me Partizanin. Ahmataj thotë se po punon që skuadra të jetë e qetë dhe të luftojë për të marrë tre pikët në të dyja sfidat. “Unë s’kënaqem kurrë me barazim. Ne do hymë në fushën e lojës për të dhënë maksimumin. Normalisht Tirana, ju po e shikoni që po punohet shumë. Duhet t’i përgatisë ndeshjet me mënyrën e duhur, me qetësinë e duhur sepse në fund fare është një ndeshje që ka 3 pikë. Nuk ka presion fare. Unë çdo presion e kam marrë mbi shpinë, po ta shikoni edhe në situatat e javëve të kaluara. Të gjithë janë marrë me mua. E kam anashkaluar skuadrën nga kjo pjesë. Çdo gjë do ta marr vetë përsipër”, tha trajneri.

Ahmataj thotë se objektivi i Tiranës mbetet titulli kampion. Por trajneri thotë se për të arritur deri atje është rrugë e gjatë, ndërsa ekipi duhet të japë maksimumin në çdo takim. “Nuk e vë fare në dyshim objektivin për titull kampion. Besoj se ne do shkojmë përpara për të shkuar te titulli. Se sa do të arrijmë, ne kemi për detyrë të japim maksimumin si unë, ashtu edhe lojtarët sepse ne nuk kemi rezultatin në dorë. Pas atij maksimumi kemi mundësi t’i marrim ndeshjet”, tha ndër të tjera trajneri.

“Njiheshim që në shkollë”, Ahmetaj tregon historinë e tij me familjen Reçi

Tragjedia që krijoi tërmeti i 26 nëntorit, preku mijëra shqiptarë, e padyshim mes tyre dhe politikanët. Ish-ministri i Financave dhe Eknomisë, Arben Ahmetaj, që aktualisht drejton Komitetin për Rindërtim, tregoi në “Real Story” të gazetarit Sokol Balla, njohjen me familjen Reçi në Durrës. Ahmetaj tregoi se njihej që në shkollë me kryefamiljarin, Eduardin, që humbi jetën së bashku me jetën dhe vajzën nga tërmeti tragjik.

“Me të ndjerin Eduard, Eduardin njihemi që në shkollë. Kemi punuar në ‘97-‘98 në Ministrin e Financave dhe Tatimeve dhe kemi pasur miqësi të vazhdueshme ndër vite. Humbje e madhe për familjet e tyre, shumë e madhe për gjithë psikologjinë shoqërore që rëndohet nga humbje njerëzish nga fatkeqësi natyrore që edhe në aspektin shkencor nuk mund të parashikohet”, deklaroi Ahmetaj.

Më tej, Arben Ahmetaj foli dhe për situatën e vështirë të rindërtimit dhe kalimin e emergjencës kombëtare. Ai tha se e gjitha kjo kalohet vetëm me kontributin e shumë aktorëve, ndërsa theksoi se qeveria ka peshën kryesore në këtë proces.

“Janë elementë që kanë të bëjnë me emergjencën dhe post emergjencën për të shkuar pastaj tek rindërtimi. Ajo që dua të theksoj është përgjigjja e gjithë aktorëve të shoqërisë. E para është qeveria me një grup 24 orë i drejtuar nga ministri Çuçi. Ne fondet do t’i vendosim për rindërtimin. Ajo që bën kryeministri apo që tentojmë të bëjmë të gjithë ne, në korsitë e tyre, jo vetëm qeveria, parlamenti, aktorë të shoqërisë civile, këtu bëhet fjalë për ringritje”.

“Emergjencë, ringritje, rindërtim. Ringritja është edhe ringritje për shoqërinë sepse kanë humbur jetë njerëzish, janë lënduar qytetarë, janë dëmtuar banesa. Është një traumë shumë e rëndë shoqërore. Tek ringritja nuk është vetëm një njeri, një entitet. Patjetër që qeveria ka detyrën por ka nevojë edhe për kontribut nga të gjithë aktorët për ta ringritur shoqërinë”, deklaroi Ahmetaj./Realstory.al/