Kryeministri Edi Rama shkruan të premten se godina e teatrit kombëtar vetëm emrin ka të tillë, pasi është një gërmadhë që në të vërtetë përdorej si kapanon për ushtarët nga Italia dhe regjimi komunist e kthehu në Teatër.
Kryeministri ka postuar një tjetër deklaratë nga aktorët e njohur, për nevojë e ngritjes së një Teatri të ri.
Ai ka postuar amanetin e aktores Drita Haxhiraj, e cila shprehej disa kohë më parë, se beteja nuk mund të bëhet për muret.
“Aktorja e njohur Drita Haxhiraj, është ngjitur një jetë të tërë në skenën e Teatrit Kombëtar.
Ajo bën pjesë tek shumica e komunitetit teatror që kërkon ndërtimin e një Teatrit të Ri Kombëtar në vend të kapanonit të ushtrisë italiane, i cili u kthye në teatër gjatë komunizmit dhe mbeti një karakatinë gjithnjë e më jodinjitoze, deri sot e gjithë ditën.
Një gërmadhe që vetëm emrin ka teatër, e që as në ditët e veta më të mira nuk e ka lehtësuar, po e ka vështirësuar dhe dëmtuar aktivitetin artistik me kushtet e veta mizerabël, me hapësirat krejt të papërshtatshme për një teatër normal (lëre pastaj KOMBËTAR), me mungesën e mjediseve për aktorët e me radhë”, shkruan Rama i cili më pas rikthen në vëmendje edhe deklaratën e aktores Haxhiaj.
“Në atë godinë ruajmë kujtime të hidhura edhe të ëmbla. Godina është shumë e shtrenjtë për ne, është “Jerusalemi ynë”, siç ka thënë edhe Robert Ndrenika.
Por duhet t’ju them se gjendja e saj fizike është e rëndë. Kur ne futeshim poshtë skenës për të kaluar në anën tjetër, atje kishte lagështirë dhe myk.
Aty janë sëmurur shumë aktorë. Në vitet 1972-’73, Naim Frashëri, Violeta Manushi, Sulejman Pitarka diskutonin për të bërë një teatër të ri, sepse të gjithë po sëmureshin nga mushkëritë.
Pjetër Gjoka u sëmur nga mushkëritë. Për mos t’ju thënë edhe të fundit, që për shkak të mushkërive është ndarë nga jeta kolegu dhe partneri që nga fëmijëria, Roland Trebicka.
Vetë ata që e krijuan e ngritën si problem se duhet një teatër i ri. Ata donin vendin, territorin, por jo muret. Ky është amaneti i tyre!
Ne jemi me ta, që teatri të bëhet i ri dhe modern, jo për të kaluar radhën apo për të përfituar ndonjë tjetër. Të jetë aty ku është, të ndërtohet bukur edhe t’u vlejë brezave të ardhshëm”, është shprehur aktorja Haxhiraj.
Emrat më të njohur të skenës së teatrit janë shprehur pro shembjes së godinës dhe në mbështetje të ndërtimit të një teatri të ri e bashkëkohor. Një grup artistësh të mbështetur nga opozita protestojnë kundër shembjes së teatrit dhe akuzojnë qeverinë për projekt korruptiv.